Trajneri i Tiranës, Ilir Daja ka folur menjëherë pas ndeshjes me Skënderbeun. Tekniku i bardhebluve deklaroi që skuadra e tij e meritoi fitoren dhe gjithashtu zbuloi objektivin e ekipit. Daja tregoi që kjo fitore ishte dhuratë për Gentian Muça.
"Kishim përpara ekipin që kryesonte këto gjashtë javë. Kishim një motiv për të treguar, atë që mundëm të bëjmë. Kemi bërë një lojë në grup. Një pjesë e parë shumë më e mirë se kundërshtari, pastaj ramë në presionin e kundërshtarit, për meritë të tyre, por edhe për një efekt psikologjik pasi nuk fitonim disa ndeshje. Është një suport i fortë psikologjik, pasi sonte mësuam se mund të mundim çdo skuadër. Duhet të rrijmë me këmbë në tokë, pasi është vetëm java e shtatë. Më mirë për ne është të mos ndryshojmë objektivin, por t'i marrim ndeshjet 1 nga 1 dhe pastaj shohim për objektivin final.
Taku dhe Muzaka e kompletojnë krahun e djathtë, dhe krijojnë shumë vështirësi për kundërshtarin. Ata tërheqin një nga mbrojtësat e qendrës së kundërshtarit dhe i krijojnë hapësirë sulmuesit tonë. E kemi zgjedhur në këtë mënyrë, pasi pozicionimi i Muzakës i jep shpejtësi lojës bardheblu.
Nuk patëm një nisje të mirë, ndërsa në dhjetë minutat e fundit, ishte dhe meritë e kundërshtarit, i cili nuk pajtohet lehtë me humbjen. Ne humbëm përqëndrimin në linjën e dytë dhe jo në mbrojtje, pasi lamë lojtarët e Skënderbeut të luanin lirshëm teksa pësuam edhe golin.
Gjithë kjo fitore i shkon Gentit, pasi gjithë ishim të bindur se do t'ia bënim dhuratë fitoren. Është një lojtar shumë i rëndësishëm i skuadrës sonë", përfundoi trajneri Daja në mikrofonin e Supersport.
Lexo gjithashtu
