Administratori i klubit të Vllaznisë Suad Lici analizoi skuadrën shkodrane dhe qartësoi për publikun futbolldashës projektet e klubit shkodran për vitin 2019. Kreu i klubit kuqeblu u shpreh për "RTSH Sport".
"Në aspektin sportiv, sa i përket kësaj periudhe, skuadra ka qenë aty ku duhet. Djemtë kanë qenë të përkushtuar. Nëse kthehemi te fillimet tona nuk ka qenë aspak e lehtë. Skuadra ka qenë e rënë moralisht. Natyrisht që pas masave drastike që morëm, edhe me kontratat si administratë, trysnia dhe indinjata që kishte qyteti për atë që kishte ndodhur nuk ishte aspak pozitive.
Dua të falënderoj këto djem për kontributin që kanë dhënë për atë që këto 5 muaj kemi bashkëpunuar së bashku.
Projektet e ardhshme dhe akademia? Do të kemi dhe disa projekte të tjera, por për momentin nuk mund t'i bëj të ditura ,deri sa të finalizohen. Do të kemi diçka konkrete në muajit në vazhdim.
Nuk e kuptoj këtë zhurmë që është bërë, por secili është në të drejtën e tij. Ne e kemi strategjinë e qartë, nuk duam që të fyejmë lojtarët e Akademisë së Vllaznisë apo të akademive këtu pranë Shkodrës, por duam që të kemi produkt cilësor, pasi e shohim se direkt nga Akademia nuk mund të na përfaqësojnë dot.
Ne kemi menduar që të bëjmë një Vllaznia B sa më të fortë dhe lojtarët të kenë mundësi të shprehen te Vllaznia B, për më të mirën e tyre që ne t'i kemi në fokus", deklaroi Lici.
Vllaznia është favorite kryesore për t'u ngjitur në Kategorinë Superiore në vitin 2019. Ndërkohë, drejtori sportiv Engin Firat dhe administratori Lici udhëtuan para disa kohësh në Nigeri me synimin për të sjellë lojtarë afrikanë në Shkodër për të përforcuar ekipin për kompeticionet e ardhshme.
Lexo gjithashtu
