Tamas Fehrer ka deklaruar se shtanga kuqezi është në rrugë të mbarë. Lektori i Federatës Botërore të Peshëngritjes ka dhënë një intervistë për RTSH Sport ku ka analizuar këtë sport në vendin tonë.
Edhe pse Coronavirusi ka paralizuar thuajse çdo hallkë të jetës, Fehrer shprehet optimist për të ardhmen e peshëngritjes shqiptare.
“Ne po jetojmë në një periudhë mjaft të vështirë në sportin e peshëngritjes për shumë arsye. Një nga arsyet është padyshim kriza e shkaktuar nga koronavirusi, që na e ka bërë jetën mjaft të vështirë. Unë shpresoj që të gjithë miqtë e mi në Shqipëri, të gjithë peshëngritësit apo trajnerët, të jenë të paktën duke u stërvitur në shtëpi, për ta përgatitur veten për garën e radhës, që, sipas të gjitha gjasave do të jetë Kampionati Evropian në Rusi dhe nuk do të kenë probleme nga shtyrja e Lojërave Olimpike.
Unë mora ca lajme të mira nga Shqipëria dhe nuk e kisha vënë në dyshim që të këto lajme të mira nuk do të vononin.
Pas disa vitesh të vështira në këtë drejtim, në kontrollet më të fundit të antidopingut, të gjithë rezultuan negativë, çka unë po e prisja dhe jam i lumtur që kështu ndodhi. Për mua kjo do të thotë që Federata Shqiptare e Peshëngritjes po punon mjaft mirë për të mbuluar siç duhet këtë aspekt të stërvitjes.” Për 60-vjeçarin, kjo ka ardhur edhe si pasojë e ndërgjegjësimit të komunitetit të shtangës dhe prandaj ai është optimist për të ardhmen e peshëngritjes shqiptar.
Në krahun tjetër, trajnerët dhe sportistët e kanë kuptuar tanimë se ku janë kufinjtë e tyre në këtë drejtim, se çfarë duhet të bëjnë e çfarë nuk duhet të bëjnë. Dhe kjo më bën të sigurt se Federata Shqiptare e Peshëngritjes është në rrugë të mbarë për një të ardhme të mirë, e drejtuar nga miku im dhe dashamirësi i këtij sporti, Theodhor Masllavica, dhe prandaj i uroj atij dhe gjithë komunitetit të shtangës në Shqipëri të vazhdojnë në këtë rrugë dhe suksese në Evropianin e Moskës”, ka thënë ai.
Lexo gjithashtu
