“Abissnet Superiore” ka mbyllur pasditen e djeshme javën e 32-të të saj. Të 5-ta ndeshjet e kësaj jave kanë përfunduar, me disa ndryshime edhe në tabelën e klasifikimit.
Kukësi u mposht në shtëpi nga Skënderbeu me rezultatin 0-2, me verilindorët që tashmë janë në pritje vetëm të rënies zyrtare. Në krahun tjetër, korçarët shkojnë në kuotën e 44 pikëve, në vendin e 6-të. Po 2-0 fitoi edhe Tirana në transfertë përballë Erzenit. Bardheblutë me këtë fitore rikthehen në “Final 4”, duke shkuar në kuotën e 46 pikëve, me pikë të barabarta me Dinamon e vendit të 5-të.
Kujtojmë që këta të fundit u mposhtën 2-0 nga Partizani në “Arenën e Demave”, me të kuqtë që mobilizohen në vendin e 3-të me 51 pikë. Erzeni në krahun tjetër mbetet me 31 pikë në vendin e parafundit, duke besuar vetëm te mrekullitë që mund të ndodhin.
Në ndeshjen tjetër, Laçi u mposht me përmbysje nga Egnatia me rezultatin 1-2. Kurbinasit mbeten në kuotën e 38 pikëve, në vendin e 7-të, ndërsa të besuarit e Edlir Tetovës vazhdojnë shkëputjen në krye, duke parë ndjekësit me ‘dylbi’ dhe duke shkuar plot +8 nga Vllaznia e vendit të dytë.
Shkodranët barazuan me rezultatin 0-0 përballë Teutës në “Niko Dovana”, 1 pikë e cila i vlen disi durrsakëve. Këta të fundit mbeten gjithsesi në zonën “Play Out”, me 38 pikë, po aq sa Laçi.
Lexo gjithashtu
