Shefi i klubit të Studentit, Blendi Nallbani ka dhënë një intervistë për RTSH Sport ku ka folur dhe analizuar gjendjen e ekipit kryeqytetas.
Ai është bërë mbështetës i Farka Volej, ku veç futbollit, bën apel t'i jepet një "dorë e mirë" edhe sporteve të tjera në vend. Në fjalën e tij, ish-portieri i njohur deklaroi:
"Studenti është një klub me emër. Një klub që i ka dhënë tonin sporteve, jo vetëm futbollit, por dhe lojërave me dorë. Një klub me histori të madhe dhe kështu shpresojmë të ndodh dhe këtë vit.
Përpara 2-3 muajsh kemi ngritur edhe ekipin e çiklizmit. Duke qenë se Dinamo u prish, një legjendë e sportit shqiptar, menduam që t'i mbajmë ato djem dhe t'i japim vlerë çiklizmit. Jemi munduar që nëpërmjet mbështetjes së Bashkisë së Tiranë, këtu gjej rastin të falënderoj kryetari e Bashkisë së Tiranës, Erjon Veliaj, që t'i mbajmë të gjitha sportet.
Studenti dhe Partizani, sepse Tirana dihet që prej vitesh mbështetet nga Bashkia e Tiranës, kanë kaluar pjesë e Bashkisë. Nëpërmjet atij buxheti mundohemi t'i mbajmë të gjitha sportet.
Volejbolli? Studenti, Partizanit dhe Tiranës i kanë mbetur vetëm emra. Tanimë duhen parë dhe skuadra si Farka Voleji, ndërsa bëhet një punë e mirë nga trajneri Dritan Bardhi. Ka lojtarë si Bega e Aga, apo Qepa, që janë të perspektivës dhe është turp që diskutohet për trajtimet ushqimore. Unë kam biseduar dhe me Kryetarin e Bashkisë, Veliaj, apo dhe Federatën Shqiptare të Volejbollit, që kanë premtuar mbështetje.
Madje i bëj thirrje dhe shefit të klubit shumësportësh Tirana, Pirro Kolekës, apo dhe të Partizanit, Shkëlqim Muçës, që ta ndihmojnë këtë skuadër, që i ka dhënë tonin volejbollit shqiptar. Mos harroni që më 2016-ën, në Cev Cup, përballë turqve të Zirat Bankasit Ankara kam marrë lojtarë si Rejdi Koçi dhe Amarildo Deliu, që sot luajnë jashtë. Ndaj Farka Volej duhet mbështetur", ka përfunduar ai.
Lexo gjithashtu
