Skënderbeu-Dinamo ishte sfida e parë e javës së 24-të të Superligës e cila u mbyll me rezultatin 0-1 për blutë. Ndeshja u vendos nga një gol i shënuar nga Mihana që në minutën e 2-të të takimit dhe Dinamo arriti ta ruante deri në fund rezultatin duke marrë kështu një 3 pikësh me shumë vlera. Nga krahu tjetër Skënderbeu “zhytet” akoma më shumë në fundin e renditjes dhe pëson humbjen e 12 radhazi. Në fund të sfidës për “Gol pas Goli”, trajneri i Skënderbeut, Migen Memelli u shpreh:
Humbja? “Situata nuk është e mirë, çdo kush e kupton që po vuajmë. Kishim punuar në një manovër në mbrojtje dhe na vjen keq që pësuam gol aty ku kishim punuar më shumë. Të mos harrojmë që nga fillimi i sezonit, skuadra nuk ka qenë asnjëherë e plotë. Për aq koha sa një trajner nuk e ka skuadrën e plotë, gjërat vështirësohen për mua si trajner dhe për skuadrën që kishte një mënyrë loje.
Sot po e theksoj që unë jam një njeri që nuk duhet t’i bëhem barrë askujt dhe do të flas me presidentin për t’i hapur rrugën dikujt tjetër që të bëj një punë më të mirë pasi situata nuk është e mirë. Me këtë fjalë dua të mbyll këtë deklaratë dhe do të bisedoj në 24 orët e ardhshme me presidentin dhe do të marrim vendimin e duhur”, u shpreh Memelli.
Lexo gjithashtu
