Ernest Muçi vazhdon të jetë një nga më të përfolurit në Turqi, i cili me paraqitjet e tij me Trabzonspor ka arritur të fitojë “simpatinë” e të gjithëve. Së fundmi sulmuesi ka dhënë një intervistë, ku ka folur për aventurën e tij në Turqi.
Shqiptar thekson se ndihet falenderues ndaj trajnerit të Trabzonspor që po i jep hapësirë dhe liri të shprehe gjithë kreativitetin e tij. Ndër të tjera nënvizoi se po mundohet më së mirit t’ua shpërblejë tifozëve dhe klubit këtë mundësi të dhënë.
“Ndiej qartë mbështetjen e trajnerit tonë Fatih dhe kjo më jep shumë besim. Falënderoj si trajnerin ashtu edhe klubin që më besuan, më zgjodhën dhe më mbështetën. Ky besim reflektohet drejtpërdrejt në fushë.
Jo çdo trajner u jep lojtarëve të tij këtë liri. Por trajneri ynë hap hapësirë veçanërisht për lojtarët sulmues që të përdorin kreativitetin e tyre. Kjo e bën lojtarin të ndihet shumë më mirë si psikologjikisht ashtu edhe në aspektin e futbollit. Bëhesh më i guximshëm dhe më produktiv në fushë.
Të jesh këtu është një mundësi e rëndësishme për mua dhe po përpiqem ta shfrytëzoj sa më shumë. Duhet ta kthesh mbështetjen që të jep klubi në mënyrën më të mirë të mundshme dhe unë po përpiqem ta bëj këtë.
Për ekipet me baza të forta tifozësh, ky është një avantazh i madh. Në Trabzon, njerëzit e duan dhe e mbështesin shumë ekipin. Ata e jetojnë futbollin me një pasion të jashtëzakonshëm. Ne profesionistët nuk kemi justifikime, edhe nëse marrim një rezultat të keq, duhet të luftojmë në ndeshjen tjetër. Reagimi i tifozëve vjen nga dashuria. Por kur dalim në fushë, duhet të japim gjithmonë më të mirën tonë”, ka theksuar shqiptari.
Ish-i i Tiranës në këtë sezon me Trabzonspor ka luajtur në 19 ndeshje, ku ka arritur të shënojë 10 gola dhe të dhurojë edhe 3 asiste.
Lexo gjithashtu
