Sipas një sondazhi që u krye nga PFA “Shoqata e Futbollistëve të Anglisë” dhe sipas rezultateve të tij 40 nga 843 futbollistët që morën pjesë në këtë studim kishin menduar në një moment vetëvrasjen.
Gjithashtu, studimi thekson se rreth 10% e lojtarëve janë “bullizuar” gjatë karrierës së tyre. 12% janë ndjerë të detyruar të vaksinohen kundër koronavirusit, ndërsa pothuajse 20% kanë përjetuar stres.
Drejtori i mirëqenies së lojtarëve në PFA, Michael Bennett, tha për “Associated Press” se: "Këto shifra theksojnë se sa të rëndësishme janë këto çështje për sportin".
Sa i përket “bullizmit”, Bennett shpjegoi se ai mund të vijë nga vetë shokët e skuadrës, stafi i trajnerëve ose bordi i drejtorëve. “Ne jemi veçanërisht të shqetësuar sepse e dimë se lojtarët mund të izolohen nga një klub kur përpiqen të detyrojnë një transferim. Ne përballemi shpesh me raste të tilla. Lojtarët kanë të drejtë të ndjehen të mbrojtur në vendin e tyre të punës” , tha ai.
Hulumtimi është kryer për lojtarët që luajnë nga Premier League deri në divizionin e katërt gjatë sezonit 2021/2022.
Lexo gjithashtu
