Shumë ndryshime te Kukësi, zbuloni si do të luajnë sonte në Vjenë

Kukësi do të përballet me Austrinë e Vienës sot në mbrëmje për të mbrojtur minimalisht një rezultat pozitiv. Skuadra është përforcuar së tepërmi, ku në përbërjen e verilindorëve janë shtuar tre lojtarë nga radhët e Skënderbeut, por edhe malazezi Scepanoviç.

Formacioni i verilindorëve është zbuluar nga mediat austriake, të cilat në sajtet e tyre kanë nxjerrë në pah formacionet paraprake të sfidës së sotme, ku nga porta në sulm bëjnë këtë vendosje të verilindorëve:

Në portë do të luajë Enea Koliçi, të cilit i besohet kuadrati pasi ka pësuar vetëm një gol në dy sfidat e para të Europa League. Ndërsa në mbrojtje do të luhet me katërshen e zakonshme Hallaçi, Shameti, Malota, Mici.

Sa i përket mesfushës, trajneri Hasan Lika ka bërë ndryshimet e para që pas ardhjes së lojtarëve të Skënderbeut. Lilaj dhe Latifi parashikohen titullarë, të cilët do të kenë ndihmesën e Dvornekoviç dhe Demës.

Në sulm ekipi do të guxojë, ku do të provojë të luajë me dy lojtarë, ku Rangel dhe Emini do të luajnë së bashku.

Sa i përket stolit, edhe aty ka ndryshime. Janë larguar disa emra nga takimi i parë, ku përfshihet dhe Gentian Muça i dëmtuar, por edhe Bedri Greca që u ndëshkua me karton të kuq në Nikshiq. Përkrah portierit Koçi do të ulen Alla, Fukui, Musolli, Jean Carioca, Guri, Scepanoviç. Pra, Fukui dhe Scepanoviç janë surpriza nga takimi i kaluar. Malazezi ishte i pafederuar, ndërsa japonezi u huazua së fundmi.

Formacioni i mundshëm

Kukësi: Koliçi – Hallaçi, Shameti, Malota, Mici – Latifi, Dema, Lilaj, Dvornekoviç – Emini, Rangel Në stol: Koçi – Alla, Fukui, Musolli, Jean Carioca, Guri, Scepanoviç.