Klubi i Milanit po ristrukturohet për sezonin e ri. Jo vetëm në merkato, por dhe në rang drejtuesish kuqezinjtë po ndryshojnë kupolën drejtuese. Me emërimin e drejtorit sportiv brazilian Leonardo dhe rikthimin e “kapitenit të përjetshëm” Maldini, një tjetër ikona e “Djallit” ka lënë të hapur mundësinë për t’u kthyer në “shtëpinë e dashur” të Milanit. Fituesi i Champions League dhe “Topi i Artë” i viti 2007 Ricardo Kaka i është propozuar marrja e një posti drejtues në klubin kuqezi.
Lidhur me pyetjen e bërë nga media braziliane UOL, Kaka ka qenë i hapur për ribashkimin me Milanin.
” Marrëdhënia me Milanin është shumë e ngushtë. Ka qenë gjithmonë e tillë dhe tani me kthimin e Leonardos, Maldinit, figurave me të cilët kam luajtur dhe kam një marrëdhënie të shkëlqyer, mundësia rritet. Prioriteti im është të jem me fëmijët në Brazil, por dyert hapen dhe të shohim se si bota e drejtorit sportiv funksionon. Nuk është e thënë se duhet të mbetem në Itali ose të kem përgjegjësi, duhet më tepër të shikoj tregun”, deklaron 36-vjeçari.
Ai luajti me Milanin për 6 vite nga 2003 deri në 2009 dhe 2013-2014.
