Ish-presidenti i FIFA-s, Sepp Blatter, ka shokuar me një deklaratë të tij për gazetën argjentinase “La Nacion”. Ai ka deklaruar se shortet për Europa League kanë qenë të trukuara, pasi UEFA ka përdorur gogla me nxehtësi të ndryshme. Blatter thekson se kjo ka ndodhur vetëm te UEFA dhe asnjëherë te FIFA dhe për këtë insiston me të madhe.
“E kam parë vetë, me sytë e mi dhe ishte tamam si duke bërë me hile”, ka zbuluar Blatter.
“Ishte për një kompeticion evropian. Vetëm një skuadër e ka bërë atë. Ishte skuadër italiane. Mund ta shihni te goglat që u hodh shorti duke u identifikuar nga nxehtësia e tyre. Unë isha dëshmitar”, – ka shtuar ish-presidenti i FIFA-s.
“Kjo nuk ekziston në FIFA, por kam qenë dëshmitar në shorte të nivelit evropian, ku kjo ka ndodhur, por kurrë në FIFA. Sigurisht që mund të ishte bërë, por në rastin tim nuk ka ndodhur asnjëherë, asnjëherë”, – ka përfunduar 80-vjeçari.
