Agostineli u afrua sezonin e kaluar në Superiore, si trajner i Partizanit. Italiani erdhi tek të kuqtë në merkaton e dimrit dhe sapo u afrua premtoi titullin kampion. Megjithatë kjo nuk ndodhi dhe pas përfundimit të 2 fazave, Partizani doli në vendin e dytë dhe tekniku Italian u largua. Por, merkato e verës do të kishte surpriza pasi do ta rikthente Agostinelin sërish në Superiore, këtë radhë me kampionët e Korçës. Bardhekuqtë u futën në merkato duke sjellë lojtarët që italiani dëshironte.
Me nisjen e sezonit, Skënderbeu po arrinte të merrte pikë, por loja në fushën e blertë i bëri të gjithë skeptikë. Shpesh u aludua për shkarkim të trajnerit, por presidenti Takaj ia besoi sërish postin e trajnerit. Me përfundimin e dy fazave të para, korçarët dolën jashtë pritshmërive duke u renditur në vendin e 3-të. Dje, newsport.al bëri me dije që Agostineli ishte 100 përqind i shkarkuar. Siç shihet për italianin, kjo rastësi është e hidhur, por vetëm 2 faza duket se i mjaftojnë për të ndërruar destinacion. Tashmë pritet të shihet se cili do ta zejë vendin e tij te Skënderbeu dhe cila do të jetë skuadra e ardhshme.
