Alvaro Morata është rikthyer në Madrid, pas dy sezoneve të zhvilluara me fanellën e Juventusit në Serinë A. Sulmuesi spanjoll është prezantuar në “Santiago Bernabeo”, ndërsa ka pranuar se kërkon të lërë gjurmë me “Los blancos”.
“Real Madrid është shtëpia ime. Këtu është jeta ime dhe dua të qëndroj sa më gjatë të jetë e mundur”, u shpreh Morata për mediet.
Ndërkohë që në fjalën e tij gjatë prezantimit, Morata nuk harron të falënderojë edhe Juventusin, skuadrën ku “djaloshi i artë” u rrit së tepërmi gjatë dy sezoneve të fundit.
“Ishte një pritje e gjatë deri në rikthimin tim te Reali. Por ndonjëherë është e nevojshme të ndërrosh ambient për t’u rritur profesionalisht. Unë ia arrita falë një prej klubeve më të mira në Europë, Juventusit. Tashmë jam në skuadrën më të mirë në botë dhe do bëj maksimumin për të fituar besimin e klubit”, ishin fjalët e Moratës në prezantimin e zhvilluar me fanellën e “Los blanos”.
