Vora u rikthye te fitorja në Kategorinë e Parë pas 6 humbjeve radhazi. Skuadra e Vorës ia doli të triumfonte në shtëpi me rezultatin 3-0 përballë Tomorit, duke marrë 3 pikë mjaft të vlefshme. Ekipi i drejtuar nga Endri Zjarri është tashmë një kandidat për t’u ngjitur në Superiore pas Elbasanit dhe Bylisit.
Diçka të tillë e pohon edhe mesfushori i Vorës, Okseold Sefa. Në një prononcim të dhënë për “Newsport.al”, Sefa thotë se skuadra beson te ngjitja në Superiore, teksa zbulon pikat e forta dhe të dobëta të Vorës, si edhe të ardhmen e tij.
6 humbje radhazi, çfarë ndodhi?
"Ishin 6 rezultate negative radhazi për ne. Pavarësisht humbjeve, ne kemi zhvilluar ndeshje të mira. Mendoj se ishte një periudhë jo në favorin tonë. Por si çdo ekip, edhe ne kemi patur ulje-ngritjet tona në këtë sezon".
Fitorja me Tomorin?
"Pasi kishim disa humbje radhazi, erdhi një ftiore e pastër në shtëpi, para tifozëve tanë. E dinim që do të ishte e vështirë përballë Tomorit, por ne ja dolëm. Duhet të kthejmë besimin dhe moralin në ekip pasi na pret një ndeshje e vështirë në “Elbasan Arena”.
Ndeshja e radhës ndaj Elbasanit?
"Sfida me Elbasanin do të jetë mjaft e fortë dhe e vështirë. Por ne kemi besimin që nga kjo ndeshje do të marrim një rezultat pozitiv. Ne kemi shumë besim te ky ekip dhe tek ky grup lojtarësh. Mund t’i arrijmë objektivat, por e dimë që nuk do të jetë e lehtë. Synimi jonë është Superiorja dhe kemi besimi se do ja dalim".
Cilat janë pikat e forta dhe të dobëta të Vorës?
"Mendoj se pikat tona të forta jënë, cilësia e lojtarëve dhe kualiteti me të cilin luajmë. Ne zhvillojmë një futboll të bukur dhe të shpejtë, ku sakrifikojmë e vrapojmë të gjithë për njëri-tjetrin. Edhe harmonia në grup është një nga pikat tona të forta. Pikë të dobët nuk mund ta quaj, por diçka që na ka penalizuar këtë sezon janë ndeshjet jashtë fushës sonë".
E ardhmja e Sefës?
"Sa i përket të ardhmes, unë kam një kontratë me ekipin e Vorës që skadon në verën e vitit 2026. Nuk e kam menduar largimin nga Vora".
Lexo gjithashtu
