Manchesteri nuk shkoi përtej barazimit 1-1 ndaj Bournemouth dhe skuadra e tij humbi një penallti me Zlatan Ibrahimoviç duke mos mundur ta shënonte golin e dytë. Për të bërë polemikë ka menduar trajneri portugez Mourinho i njohur për deklaratat e tij pikante. Ai u shpreh se e humbën penalltinë pasi nuk ishin përgatitur për të gjuajtur një të tillë pasi kurrë më parë nuk kishin marrë një penallti.
“Si mund të stërviteshim për penallti kur nuk na akordojnë asnjëherë të tilla” – është ankuar trajneri. Ai ka habitur jo pak veta me këtë deklaratë pasi të gjithë e dinë se sa e thjeshtë është të realizosh nga 11 metra dhe nuk ka nevojë që skuadra të përgatitet e gjitha për penallti. Por portugezi dihet që i mbron lojtarët e vet deri në fund dhe me shumë mundësi ky është justifikimi i radhës duke thumbuar edhe arbitrat të cilët ai i ka përherë në objektiv me sjelljet e tij provokuese. Mourinho kërkon të krijojë tek skuadra një opinion sikur të gjithë i kanë kundërt dhe sipas tij kjo e bën grupin më të fortë dhe të mund të fitojë trofe.