Mërgim Mavraj ka nisur nga puna me skuadrën e re. Mbrojtësi kuqezi la Këlnin dhe kaloi te Hamburgu, ku do të përfitojë 1.8 milionë euro rrogë në sezon.
Sot ai është vendosur në urdhrat e trajnerit Markus Gisdol për të zhvilluar seancën e parë stërvitore me pjesën tjetër të ekipit.
Nga Këlni te Hamburgu. Mërgim Mavraj bëri një tjetër zgjedhje në karrierën e tij duke kaluar në një klub legjendar, ndonëse prej vitesh nuk është më në nivelet e dikurshme.
Mbrojtësi kuqezi ka marrë përsipër një risk jo të vogël me transferimin e tij në këtë merkato dimri, por ai mbetet optimist.
Hamburgu e bindi pak ditë më parë, më shumë se një rinovim i mundshëm me Këlnin në verën e këtij viti dhe tashmë Mavraj duhet të luftojë me ekipin e ri për të mos rënë nga kategoria.
“Në fakt, unë rrezikoja të mbetesha pa skuadër në verë. Ndaj u mendova dhe vendosa sa më shpejt. Nuk është e lehtë të luftosh për mbijetesën në Bundesligë, por Hamburgu është një shans që nuk duhet humbur.
Faktori kryesor që më bindi për të shkuar te Hamburgu ishte roli si lider skuadre, që klubi më ofroi para nënshkrimit të kontratës”, tha Mavraj për “Spox.com”.
