Vazhdimisht KOKSH ka mbështetur disa sportistë që nuk kanë qenë pjesë e Bursave Olimpike nga Komiteti Olimpik Ndërkombëtar, por që kanë patur potencialin si sportistë për tu kualifikuar për në Lojërat Olimpike.
Për këtë arsye, me propozimin e Komisionit Teknik të KOKSH në mbledhjen e fundit, Komiteti Ekzekutiv i KOKSH vendosi të mbështesë financiarisht me Bursë mujore dy peshëngritësit shqiptar Briken Calja dhe Erkand Qerimaj.
Duke filluar nga muaji qershor, Briken Calja do të përfitojë nga KOKSH mbështetje financiare me vlerë 600$/muaj ndërsa Erkand Qerimaj në vlerën 400$/muaj deri në fund të vitit.
Calja tashmë e ka arritur normën Olimpike por pritet zyrtarizimi nga Federata Botërore, ndërsa po kaq afër kualifikimit për “Tokyo 2020” është edhe Qerimaj.
KOKSH gjatë 2019 e ka mbështetur financiarisht sportistin Briken Calja për kualifikim në Lojërat Olimpike. Madje jo vetëm kaq, por ka financuar edhe ekipin shqiptar (Briken Calja, Erkand Qerimaj dhe Krenar Shoraj ) për përgatitje dhe pjesëmarrje në Kampionat Botëror në vlerën 7500$.
Mbështetja jepet nga Fondet e KOKSH në kuadër të përgatitjes dhe kualifikimit në Lojërat Olimpike “Tokyo 2020” të cilat do të zhvillohen në Korrik- Gusht 2021.
Lexo gjithashtu
