Një ndeshje me të vërtetë spektakolare u zhvillua në Tenessee aty ku Memphis Grizzlies mposhti pas kohës shtesë San Antonion duke barazuar në 2-2 serinë e cerekfinaleve mes tyre. Në një ndeshje të ekulibruar për pjesën më të madhe të kohës, fitoi në fund grinta dhe dëshira e vendasve. Memphis triumfoi me rezultatin e ngushtë 110-108 falë edhe 35 pikëve të realizuara nga Mike Conley. Një paraqitje super për Spurs-at bëri Kawhi Leonard autori i 43 pikëve, por ylli i San Antonios nuk arriti të evitonte dot humbjen e skuadrës së Gregg Popovich që pavarsisht gjithckaje vazhdon të mbetet favorite për të kaluar më tej./Supersport Në Lindje barazoi në 2-2 serinë Toronto Raptors. Skuadra kanadeze triumfoi në transfertë ndaj Milwaukee Bucks me shifrat 87-76, në një ndeshje ku gabimet e shumta ishin evidente nga të dy krahët. I vetmi që shkëlqeu ishte i përhershmi DeMar De Rozan autori i 33 pikëve. Në Georgia kishte festë edhe për Atlanta Hawks që rihapi serinë ndaj Washington Wizards. Në Philips Arena, vendasit kishin një marsh më shumë se skuadra kryqytetase me Atlantën që mori një fitore të lehtë me rezultatin e thellë 116-98. Ishte ndeshja e Millsap autori i 29 pikëve dhe 14 rebound-eve për Hawks, ndërsa shkëlqeu edhe gjermani Denis Schroder që e mbylli ndeshjen me 27 pikë dhe 9 asist. Te ËWashingtoni nuk zhgënjeu ylli i skuadrës, John Wall që këtë herë realizoi 29 pikë të pamjaftueshme gjithsesi për të evituar humbjen e Wizards.