Në një intervistë për faqen zyrtare të Federatës Shqiptare të Futbollit, ambasadori i Zvicrës në Tiranë, Kristof Graf, ka komentuar ndeshjen e nesërme në Francë mes Zvicrës dhe Shqipërisë. Ai është një tifoz i hershëm futbolli dhe në Shqipëri ka ndjekur disa ndeshje të kombëtares kuqezi, ku veçon ato me Serbinë. Ambasadori Graf, si diplomat që është, thekson se ndeshja mes Zvicrës dhe Shqipërisë do të ketë dy fitues, dukë argumentuar se do të fitojë miqësia dhe partneriteti mes dy vendeve. Kurse për faktin që shumë lojtarë me rrënjë shqiptare luajnë për Zvicrën dhe të tjerë të rritur në Zvicër kanë zgjedhur Shqipërinë, ambasadori pohon se kjo është një temë vetëm për tituj gazetash, pasi të gjithë janë profesionistë dhe kanë të drejtën të zgjedhin sipas dëshirës së tyre. Ambasadori Graf bën me dije se po mundohet të organizojë një aktivitet për shfaqjen e ndeshjes nesër në Tiranë, me qëllimin për të krijuar një ambient edhe më të bukur.
Lexo gjithashtu
