Kristaq Miço ka folur për finalen e Conference League, teksa sot Roma do të përballet me Feyenoord në stadiumin “Air Albania”. Ish-kryetari i Federatës Shqiptare të Futbollit përgëzon FSHF-në për punën e jashtëzakonshme duke sjellë në vendin tonë këtë finale të madhe.
I ftuar në emisionin “Mirëmëngjes Shqipëri”, ish-presidenti i Federatës tregoi se si kanë ndryshuar nga vitet 80-90 e deri në ditët e sotme. Në fjalën e tij në panelin e emisionit, Miço tha:
“Nuk kishim kushtet ne atëherë në stadiume për të zhvilluar një aktivitet të tillë. Stadiumi i ri bëri të mundur, jo vetëm ajo, por edhe përpjekjet e Federatës për të marrë përsipër organizimin e një finale të tillë siç është Conference League. Një aktivitet shumë i rëndësishëm, mbase edhe për Shqipërinë, edhe pse nuk janë dy skuadra shqiptare që finalizojnë për këtë takim.
Por, rëndësi ka që zhvillohet në Shqipëri dhe është një propagandë e madhe dhe për vendin tonë, por edhe për sportin në përgjithësi. Përveç tifozëve do të vijnë dhe njerëz të tjerë që janë të gatshëm për të parë kryeqytetin tonë. Ajo që është me rëndësi është ndeshja sportive mbi të gjitha. Federata jonë u nis më tepër për të propaganduar stadiumin tonë. Nëse sot zhvillohet një finale Conference League, mundësitë janë për t’u zhvilluar dhe një finale e Champions League apo UEFA-s. Mundësitë janë. Ose një pjesë e aktiviteteve për t’u zhvilluar.
Kapaciteti - Kryesorja është numri i vendeve. Kërkesat janë të mëdha si në çdo vend të botës. Duke qenë se ishte një aktivitet më i ulët se Kupa e Kampionëve, e pranoi UEFA dhe për ta vënë në provë. Ishte dhe strategjia e tyre për të promovuar një stadium të ri, një stadium të ri. Për të promovuar edhe Tiranën apo Shqipërinë.
Infrastruktura – Ka një ndryshim të madh mes periudhës së kaluar dhe asaj aktuale. Asokohe ne punonim me një sistem tjetër. Nuk merrnim lojtarë nga jashtë. Çdo gjë duhej përgatitur brenda vendit. Ishte sistemi i miratuar nga Këshilli i Ministrave dhe i propozuar nga ne të sportit. U desh 10 vite, ne u mundëm atëherë 8-0 nga Gjermania. Qeveria dha urdhër të shkarkohej gjithçka. Të fillonte çdo gjë nga e para. Dhe filluam një punë nga fillimi i 82-shit. Sistemi komunist, marrëdhënia e vetme me Kinën na la prapa në shumë fusha të tjera. Ngritëm Kombëtaren e të rinjve. Hymë në finalen e kampionatit të të rinjve në Finlandën”, tha ndër të tjera ai.
Lexo gjithashtu
