Atalanta ia doli të triumfonte në shtëpi përballë Lecces. Ndeshja e vlefshme për javën e 18-të të Serie A, përfundoi me fitoren minimale 1-0 të bergamaskëve. Një 3 pikësh mjaft i rëndësishëm për Atalantën që i dërgon në vendin e gjashtë të rënditjes, por edhe “Derbi i Shqiptarëve” i fituar nga Gjimshiti përballë Ramadanit ka bukurinë e saj.
Pas kësaj sfide, është pikërisht qendërmbrojtësi i Kombëtares shqiptare, që ka folur në një konferencë për shtyp para mediave. Kapiteni i Kombëtares foli edhe për një vlerësim të përgjithshëm të vitit 2023.
“Mund të themi se sot ishte një ndeshje pozitive nga ne. Kjo ishte një fitore e rëndë dhe donim ta mbyllnim mirë vitin para tifozëve tanë”, u shpreh fillimisht Gjimshiti.
Vështirësi në shënimin e golave? – “Kjo varet edhe nga kundërshtari. Lecce po luante shumë mirë, nuk linte hapësira në fazën mbrojtëse dhe ishte e rrezikshme në kundërsulm.”
Renditja? – “Nuk ka kohë për të parë renditjen, ne fillojmë më 3 janar kundër Sassuolos në Kupën e Italisë dhe më pas do i marrim ndeshjet një e nga një.”
Të lumtur nga 2023? – “Në përgjithësi them se po, por ne jemi në skuadër që mendon gjithmonë të përmirësohet dhe të bëjë sa më mirë të jetë e mundur. Kjo është forca jonë që duhet të marrim me vete edhe në vitin 2024."
Merkato në mbrojtje? – “Nuk di të them, merkaton janë të tjerë që e bëjnë. Unë ndihem mirë, jam i lumtur nëse luaj, si çdo futbollist. Me raste ndjehet lodhja, por pastaj ikën kur je në fushë.”
Lexo gjithashtu
