Juventus-Porto e nxori humbës dhe të eliminuar nga Champions-i Iker Casillas, megjithatë sfida e së martës ishte një ngjarje shumë e veçantë për ish-portierin e Real Madridit dhe kombëtares së Spanjës.
Ai mbërriti kuotën e 175 ndeshjeve në kompeticionet europiane, një shifër kjo, që tejkalon legjendën e kuqezinjve të Milanit, Paolo Maldini, tashmë në pension futbollistik, me 174 ndeshje. Xavi (173 ndeshje) renditet i treti në këtë listë.
Iker Casillas e bëri debutimin e tij në Ligën e Kampionëve më 15 shtator 1999, kur ishte 18 vjeç. Pak mund të imagjinohet se ky portier shumë i ri do të arrinte lartësi të tilla gjatë këtyre 17 viteve në elitën e futbollit kontinental, të cilat e kanë bërë të njohur si një prej portierëve më të mirë të të gjitha kohërave.
Casillas ka luajtur 164 ndeshje në Champions, çka përbën rekord absolut në historinë e kompeticionit më të rëndësishëm në Europë për klubet. Ai, gjithashtu, ka luajtur në “Europa League”, “European Super Cup” dhe “Intercontinental Cup”, organizuar nga UEFA dhe FIFA. Historinë e tij në Europë e ka zili çdo lojtar. Iker ka fituar tre Champions, dy Kampionate Europianë dhe një Kupë Bote, të gjitha si pjesë e Real Madridit.
Me Porton do të jetë më e vështirë për të fituar ndonjë titull europian. Bilanci është, po ashtu, mjaft pozitiv. Me ndeshjen e djeshme, Casillas ka siguruar 100 fitore, 33 barazime dhe 42 humbje në Europë. Ai e ka mbajtur portën të paprekur në 58 ndeshje.
Lojtarët me më shumë ndeshje në garat europiane:
Iker Casillas – 175 ndeshje
Paolo Maldini – 174
Xavi Hernandez – 173
Clerence Seedorf – 163
Raul Gonzalez – 161
Javier Zanetti – 160
Ryan Giggs – 159
Pepe Reina – 155
Jamie Carragher – 150
Gianluigi Buffon – 146
Loading ...
