Në Shqipëri dhe pothuajse në të gjithë Europën aktivitetet sportive janë pezulluar për shkak të Coronavirus dhe fokusi është vetëm tek ndalimi I këtij virusi vdekjeprurës. Kjo ndalesë padyshim që ndikon në gjendjen fizike të çdo sportisti të cilët tashmë mund të stërviten vetëm nga shtëpia. Briken Çalja, Kampion Europe në peshëngritje, ka treguar vështirësitë që ka për tu stërvitur në këto momente teksa bëhet gati për aktivitetet e rëndësishme në të ardhmen siç janë Kampionati Evropian dhe Lojërat Olimpike. Në një intervistë për “Top Channel”, Çalja ka treguar se në disa raste I është dashur të përplaset edhe me policinë në mënyrë që të ketë mundësinë të plotësojë kushtet minimale të stërvitjes së tij.
“Realisht nuk kam bërë asnjë ditë pushim, pavarësisht situatës që është shumë alarmante. Normalisht është shumë e rrezikshme, por të mos harrojmë që ne sportistët gjatë gjithë kohës jemi në rrezik. Por kjo nuk do të thotë që ne do duhet të ndalim ëndrrën për të fituar medalje olimpike edhe pse është një situatë jashtë normales. Aktiviteti më i afërt është Kampionati Europian që zhvillohet në 13-21 qershor dhe Lojrat Olimpike, të cilat janë jashtëzakonisht shumë të rëndësishme.
Mund të thuhet që gjatë gjithë kohës jam në palestër duke mos bërë asnjë ditë pushim. Një nga vështirësitë e mia është lëvizja që unë bëj nga shtëpia deri këtu te kjo godinë që e kam improvizuar vetë për raste të veçanta dhe realisht më ka hyrë jashtëzakonisht në punë. Sidomos për këtë situatë sepse këtu jam vetëm dhe do më duhet të përballem edhe me rreziqet pasi nga shtëpia këtu është gati 4-5 kilometra dhe duhet të jem me makinë. Një problem është lëvizja sepse na e kanë ndaluar dhe kemi pasur përplasje me policinë.
Të them të drejtën mua do më interesonte më shumë të zhvilloheshin aktivitetet por deri tani janë në dyshim dhe kjo do të varet në muajin që vjen. Do të bëhet një mbledhje tjetër dhe nëse përkeqësohet situate normalisht që do të anulohen. Unë do vazhdoj të stërvitem pasi nëse e lë atë për një periudhë të gjatë do më duhet një periudhë 6-8 muaj që të marr formë edhe nëse e lë stërvitjen për dy javë”, është shprehur Briken Çalja.
Lexo gjithashtu
