Theofilus Solomon vetëm pak ditë më parë është arrestuar nga policia kosovare. Ish-lojtari i Partizanit kishte një fletëarrest ndërkombëtar për një vepër penale të mëparshme. Sulmuesi afrikan akuzohet për ushtrim të dhunës fizike sistematike ndaj të dashurës së tij në kohën kur luante në Shqipëri me Partizani.
Në lidhje me këtë rast ka reaguar edhe klubi i Gjilanit, skuadër me të cilën aktualisht futbollisti aktivizohet. Skuadra gjilanase ka theksuar se janë të gatshëm të bashkëveprojnë për të zgjidhur një rast të tillë. Gjithashtu nënvizojnë se nuk do të japin më komente rreth kësaj çështjeje deri në vendimin final të saj.
"Sport Club Gjilani përmes kësaj komunikate dëshiron të njoftojë opinionin në lidhje me situatën e krijuar me futbollistin e ekipit tonë, Theophilus Solomon.
Futbollisti me origjinë nga Nigeria të premten është shoqëruar nga policia për shkak të një rasti personal që ka patur më herët, teksa ishte pjesë e kampionatit shqiptar pak vite më parë.
Ne si klub do të bashkëpunojmë maksimalisht me autoritetet relevante deri në sqarimin dhe pastrimin e plotë të këtij rasti.
Sport Club Gjilani gjithmonë ka treguar kujdes gjatë angazhimit të lojtarëve të ri, kur paralel me cilësitë futbollistike vëmendje i kemi kushtuar edhe anës njerëzore. Njejtë edhe me futbollistin Theophilus Solomon, i cili ka treguar sjellje tejet korrekte dhe ka qenë shembull për të tjerët në shumë raste.
Ne si klub ofrojmë bashkëpunim sa i përket pjesës tonë të kompetencave edhe pse realisht nuk kemi asnjë lidhje me kohën dhe vendin ku ka ndodhur ngjarja.
Sport Club Gjilani nuk do të bëjë asnjë koment tjetër në lidhje me futbollistin Theophilus Solomon, derisa autoritetet kompetente të dalin me një vendim përfundimtar”, ka shkruar klubi nga Gjilani.
Lexo gjithashtu
