Ançeloti tregon ditët e para si trajner i Bajernit

Tekniku italian Karlo Ançeloti prej disa ditësh ka nisur aventurën e tij të re në krye të klubit legjendar gjerman, Bajern Mynih. Pas ditëve të para të përgatitjeve, Ançeloti ka tashmë edhe një mendim të parë mbi punën e tij të re.

“Është një eksperiencë shumë e bukur për mua dhe mezi po e pres nisjen e kampionatit. Bajern është një ndër klubet më të mëdha në Europë. Ndihem mirë këtu, kam në dispozicion një skuadër të kompletuar. Ata stërviten çdo ditë dhe janë shumë të vëmendshëm ndaj këshillave të mia. Deri më tani mund të them se gjithçka po ecën shumë mirë”, është shprehuar Ançeloti.

Ai tregoi gjithashtu se cili është çelësi i tij i suksesit, duke qënë se ka mbi supe tashmë një karrierë me shumë histori.

“Personalisht në çdo skuadër që kam stërvitur si fillim kam krijuar një marrëdhënie shoqërore me ta. I kam studiuar me kujdes aftësitë e tyre dhe se në cilin pozicion ata mund të japin më të mirën e tyre. Çdo futbollist ka karakterin e tij dhe detyra e trajnerit është ta kuptojë atë dhe ta menaxhojë sa më mirë”, tregon italiani.

Sa i përket ndonjë përforcimi të nevojshëm për skuadrën, Ançeloti tha: “E kam thënë edhe më parë, kam një skuadër të kompletuar dhe nuk e kemi të nevojshme të kryejmë blerje të tjera. Do të kërkojmë me çdo kusht që ta nisim sa më mirë këtë sezon të Bundesligës, duke fituar Superkupën e Gjermanisë përballë Borusia Dortmundit.”