Gazetari i Vizion Plus, njëkohësisht fotoreporter, Gjon Gjeka nuk u akreditua nga FSHF-ja për të qenë prezent në "Loro Boriçi" në sfidën kundër Maqedonisë.
Një vendim i tillë erdhi menjëherë pasi gazetari shkodran publikoi në rrjetet sociale gabimin e FSHF-së me banerin e Eliminatoreve, që ishte ngatërruar ai i Botërorit dhe atë të Europianit.
Në një prononcim për Newsport.al, Gjeka tregon ngjarjen dhe mendon se refuzimi i akreditimit të tij ka të bëjë me publikimin e gafës së FSHF-së.
"Ndoshta lidhet me atë publikimin që bëra në lidhje banerin e gabuar të Eliminatoreve. Para se ta bëja publike atë foto i thashë zëdhënëses për shtyp të FSHF-së, Jona Dervishit që ta ndërronte banerin se nuk kishin lidhje Kualifikimet e Europianit me ato të Botërorit. Por më tha se nuk e dinte kush i kishte vendosur, madje më foli si me përçmim e me nënvlerësim", deklaron për Newsport.al, gazetari dhe fotoreporteri nga Shkodra.
Më pas ai tregon edhe një tjetër detaj që ka lidhje me stadiumin "Loro Boriçi" dhe FSHF-në: "I kam bërë disa herë foto stadiumit gjatë fazave të ndryshme të rindërtimit, me porosi të FSHF-së pa asnjë lloj shprëblimi. A do më ndodhë sërish që të mbetem jashtë stadiumit i pa akredituar? Nuk e di. Nuk mund të paragjykoj përderisa është diçka që nuk ka ndodhur akoma", përfundon prononcimin e tij për Newsport.al, gazetari i "Vizion Plus", Gjon Gjeka, i cili prej vitesh ushtron profesionin e fotoreporterit, profesion që e ka nisur duke punuar për LSA, më pas për shtypin sportiv dhe portale, sipas tij, gjithnjë shërbime pa pagesë, pasi këtë punë e bën për pasion.
Gazetari i Vizion Plus, Gjon Gjeka
Lexo gjithashtu
