Federata e Futbollit të Kosovës i jep fund bashkëpunimit me trajnerin Primoz Gliha. Tekniku slloven nuk do të jetë më në krye të pankinës së përfaqësueses së Kosovës.
Lajmin për mbylljen e bashkëpunimin mes trajnerit dhe FFK-së e kanë dhënë këta të fundit me anë të një njoftimi zyrtar.
“Federata e Futbollit e Kosovës njofton opinionin se me përfundimin e ciklit kualifikues për Kampionatin Evropian 2024, ka përfunduar edhe marrëveshja me trajnerin e deritanishëm Primozh Gliha.
FFK-ja e falënderon përzgjedhësin Gliha për punën e tij në krye të ekipit kombëtar në gjashtë ndeshjet kualifikuese të zhvilluara pas shkarkimit të ish-përzgjedhësit, Alain Giresse.
Federata e Futbollit e Kosovës tashmë ka filluar analizimin e thellë të situatës aktuale në ekipin kombëtar A dhe pas kësaj analize do të merren masat adekuate dhe veprimet e ardhshme, përfshirë edhe angazhimin e përzgjedhësit të ri që do t’i prijë ekipit kombëtar”, shkruan FFK.
Kujtojmë që Gliha e ka drejtuar ekipin e Dardanisë në 6 ndeshjet e fundit të kualifikueseve të Euro 2024. Në këto gjashtë sfida, Gliha mori dy barazime ndaj Zvicrës, dy fitore të cilat i arriti përballë Andorrës dhe Izraelit, teksa dy humbjet erdhën në ndeshjen përballë Bjellorusisë dhe Rumanisë.
Lexo gjithashtu
