Ardian Ismajli është mbrojtësi 19-vjeçar që po “çmend” Hajdukun e Splitit, ndërsa pas transferimit te skuadra kroate, ai i ka luajtur të gjitha ndeshjet e këtij sezoni që sapo ka nisur si titullar.
Lojtari nga Kosova, pranon për newsport.al se dëshira e tij është të luajë për Kombëtaren e Shqipërisë në të ardhmen dhe një kërkesë të tillë e ka bërë në FSHF, ndonëse nuk ka marrë asnjë përgjigje.
“Prej dy vjetësh e kam bërë kërkesën për t’u pajisur me pasaportë shqiptare, që prej kohësh kur ishte trajner i Shpresave, Skënder Gega. Por ai dha dorëheqjen dhe ‘dosja’ ime nuk u hap më”, pranon Ardian Ismajli.
I pytetur nëse këto zvarritje të FSHF-së për ta pajisur me pasaportë e kanë lodhur, talenti i Hajdukut pranon: “Jam lodhur shumë, por tani të shohim se çfarë do bëhet. Edhe pse më vjen keq që e them, nuk mund të pres Shqipërinë që të tallet me mua. Të paktën të kthejnë një përgjigje. Është katastrofë fare. Nuk duhet të ketë një ndjenjë kaq indiferentizmi ndaj lojtarëve që kërkojnë të kontribuojnë për vendin e tyre. Kur nuk luan për Shqipërinë të bëjnë tradhtar. Po tani kur ekziston dëshira e lojtarit dhe nuk e ‘vë kush ujin në zjarr’? Në fakt tradhtarët janë brenda FSHF-së”, shprehet mbrojtësi 19-vjeçar për newsport.al.
Gjithsesi, te Hajduku, Ardian Ismajli është tashmë një lojtar i rëndësishëm edhe pse është transferuar prej pak kohësh, 6 muaj më parë. Ai shihet si një lojtar premtues, ndërsa i pyetur nëse do të zgjedhë Kosovën për ta përfaqësuar pranon: “Do ta shqyrtoj si mundësi”.
Lexo gjithashtu
