Ivan Jakovljeviç u bë protagonist në sfidën që Flamurtari barazoi në Vlorë 1-1 kundër Kukësit.
Në minutën e 82-të, mbrojtësi i djathtë i Flamurtarit godit si fillim Kariokën pranë vijave anësore, më pas u përplas me Rrumbullakun duke e goditur madje edhe me kokë, ndërsa iu hakërrye edhe Kushtrim Lushtakut pasi ky i fundit iu afrua me nerva për veprimin e Jakovljeviç.
Karton i kuq i padiskutuar për futbollistin serb të skuadrës vlonjate që la fushën e gjelbër kokulur, duke kuptuar se e kishte humbur arsyen në ato 10 sekonda.
Por, duke ditur natyrën e administratorit të Flamurtarit, Sinan Idrizit, i cili ka pranuar gjithnjë se disiplina brenda grupit dhe arsyeja e ftohtë në fushën e lojës janë parësore, pyetja: “A do të penalizohet nga klubi, Jakovljeviç?”, vjen natyrshëm…
Veprimi i mbrojtësit serb do të merret në shqyrtim nga Komisioni i Disiplinës, por nuk është çudi që edhe klubi i Flamurtarit të “bëjë shembull” 26-vjeçarin.
Loading ...
