Tirana do të luajë një nga ndeshjet më të rëndësishme të kësaj faze të kampionatit. Bardheblutë do të duelojnë ditën e nesërme me Vllazninë dhe mes tyre do të bëjnë llogaritë për Klasiken e Shqipërisë.
Në prag të kësaj përballjeje ka folur Bledi Shkëmbi. Timonieri i kryeqytetasve ka theksuar se skuadra e tij kërkon vazhdimësinë pas fitores me Laçin dhe në fushë do të hyjë vetëm për fitoren. Ndër të tjera foli edhe për Bekim Balaj, i cili sipas Shkëmbit është një nga lojtarët më të mirë të kampionatit.
“Luajmë ndaj një kundërshtari që ndoshta është në momentin më të mirë në kampionat, një klasike, shpresojmë dhe urojmë që të bëjmë një paraqitje të mirë për të qenë në nivelin e këtij dueli, shpresoj shumë që kundërshtari të mos ketë fatin që ka pasur, në 3 përballje që kemi bërë me ata mendoj që kemi bërë lojëra të mira, por është një ndeshje e rëndësishme për vazhdimësinë dhe në fund duhen 3 pikët.
Ne morëm 3 pikë të rëndësishme që na kanë kthyer besimin për të bërë më mirë në vijim, jemi në një situatë të vështirë, ishte ndeshje pozitive me Laçin. Kam folur me djemtë dhe nuk duhet të bëjmë gabimet e shkuara, asgjë ska përfunduar, shpresoj shumë dhe të kemi vazhdimësi për ndeshjet që kanë mbetur. Objektivi i qartë është të fitojmë ndeshjen, e rëndësishme është të largohemi nga vendi ku jemi. Duke parë pikët nuk është se ka naj gjë më shumë Vllaznia, ajo që duhet ta kemi si grup është se ne kemi më shumë nevojë për pikë, duhet të vrapojmë dhe luftojmë më shumë.
Pas ndeshjes bëhet analiza se çfarë ke dhënë në fushën e lojës, luajmë për ta fituar. Situata nuk është dhe aq e mirë, mungesa e rëndësishme është e Rafael Rafës, ka bërë ndeshje të mira dhe do ta ndjejmë mungesën, por lojtarët që vijnë për të zëvendësuar kam besim që do të bëjnë mirë. Kur luajnë dy klubet e mëdha motivohen nga njëra-tjetra. Asnjëherë nuk më ka pëlqyer për të bërë llogari para, duhet të shohim ndeshjen e radhës dhe të vjen besimi për të bërë më mirë.
Balaj është një shembull që duhet të ndiqet nga të rinjtë, ka qenë kyç te Vllaznia, duhet të jemi të kujdesshëm, kemi menduar diçka që të jemi më të kujdesshëm me atë si futbollist”, ka përfunduar Shkëmbi.
Lexo gjithashtu
