Tirana do të përballet këtë të premte me Vllazninë në transfertë, në kuadër të javës së 26-të të “Abissnet Superiore”. Sfida që do të zhvillohet në stadiumin "Loro Boriçi” do të nisë në orën 19:00. Në prag të këtij dueli ka folur edhe trajneri i ri i bardhebluve, Orges Shehi.
Ky i fundit ka treguar arsyen dhe kush e bindi të rikthehej te Tirana, ndërkohë që është ndalur edhe te Klasikja e Shqipërisë. Shehi e ka vlerësuar maksimalisht Vllazninë, e cila vlen të përmendet që mban vendin e parë në kampionat.
"Çfarë më bindi? Sigurisht që të kthehesh këtu ku unë kam shumë histori, është diçka e bukur dhe emocionuese. Nuk është se ishte ndonjë çudi e madhe për t’u bindur, edhe për shkak të asaj çfarë kam kaluar këtu. Jam fokusuar më shumë çfarë më ka dhënë ky klub mua personalisht. E kam bërë me dëshirën më të madhe, ka qenë edhe zgjedhje emocionale.
Është zgjedhje emocionale, pavarësisht se renditja nuk është aty ku i takon këtij klubi. Nuk e kam parë nga pozicioni, por nga emri. Çfarë përfaqëson për mbarë opinionin. Shpresoj që me gjithë strukturat, çunat, të dalim sa më shpejt nga ky pozicion. Nuk kam menduar kurrë çfarë do ndodhë në karrierën time. Jam në klub shumë të madh, nuk besoj se do të humbas.
Pak koiçidencë në fakt, nëse herën e parë kam ardhur nga 21-22 janar, edhe këtë vit vi në një muaj diferencë. E lashë para Vllaznisë dhe vi prapë para Vllaznisë. Shpresoj që nesër të jetë dita jonë e mirë, për të marrë atë çfarë dëshirojmë. Futbolli është sfidë, momentet janë sfida për çdo njeri dhe mendoj se njerëzit që kanë karakter të fortë, marrin sfida të vështira. E nisim aty ku e lamë, ose të paktën unë përpara Vllaznisë. Është ndeshje e rëndësishme, përballë një kundërshtari histori. Ka pozicion të mirë, por kjo kurrsesi nuk na vendos në atë trusninë që kundërshtari në pozicion më të mirë dhe ne më të dobët. Renditja duhet të fshihet nga mendja jonë, duhet të shohim përpara. Përpara është ndeshja e radhës, do bëjmë maksimumin në çdo ndeshje për të marrë maksimumin e pikëve.
Janë bashkuar rrugët në moment të vështirë. Dhe kur ka qenë bashkëbisedimi me drejtuesit, kemi qenë të dy dakord që kemi një të përbashkët shumë të madhe që është Tirana. Ne duam që ky klub të ngrihet. Dhe pastaj për vazhdimësinë, pak rëndësi ka. E rëndësishme është që të dalim nga ky pozicion, jo me fjalë, por me punë. Dhe duke pasur edhe motivimin dhe përqëndrimin e duhur të lojtarëve. Me aq sa kam parë këto 2-3 ditë, skuadra kërkon të bëjë mirë, ka cilësinë. Jemi munduar nga ana psikologjike që të punojmë pak, edhe pse ditët janë të pakta. Çdo gjë do ia lëmë vazhdimësinë. Nuk mendoj çfarë do ndodhë sezonin tjetër. I rëndësishëm ky moment, deçiziv, që ne të dalim nga kjo situatë.
Shqetësim? Koha është e pakët. Sot është dita e tretë me skuadrën, ndeshja është shumë shpejt. Është nesër. Ne themi për trajnerët që duan kohë, minimumi 6 muaj. Por duke njohur disa lojtarë që kam pasur këtu, duke njohur mentalitetin, rëndësinë, që çdo pjesëtar i klubit i jep kësaj fanelle, besoj se do ta kalojmë edhe këtë vështirësi.
Unë Tiranën e kam ndjekur, më shumë nga dhjetori e këtej. Në janar ka pasur ndryshime të mëdha. E kam ndjekur nga dhjetori, edhe për shkak të impenjimeve të mia, që kam qenë në klub tjetër dhe nuk kam pasur mundësi ta ndjek. Lojtarët që kanë ardhur, kanë cilësi, por duhet t’i bashkojmë të gjitha bashkë. Nëse një individ, cilësinë e shpreh vetëm për veten ose nuk është unison me tjerët, atëherë këto vlera shuhen. Kjo është pak vështirësia, janë shumë lojtarë që kanë ardhur para shumë pak kohësh. I duhet njohja e njëri-tjetrit.
Kush e fiton kampionatin? Nuk më intereson fare pjesa lart. Më intereson vetëm çfarë duhet të bëjmë ne në fushë. U kam thënë çunave që për ne fillon kampionat i ri, që ka 11 javë. Shpresojmë që këto 11 javë, duke hequr renditjen e kaluar, këto 11 javë të jemi ne të parët.
Unë kam respekt për ato që kanë drejtuar këtu. Unë me gjithë stafin do mundohemi që të bëjmë më të mirën tonë, për t’u ringritur. Tirana ka pasur trajnerë më të mirë se Shehi, klub me shumë histori dhe kampionate. Ne ikim dhe vijmë, por e rëndësishme është të dalim nga kjo situatë. Të mos merremi me jam i katërti apo pesti, apo ai që ka ndejtur pothuajse 3 vjet këtu.
Përmirësim do të thotë, që të bëj analizën çfarë ka kaluar. Nuk dua të merrem me çfarë ka ikur. Këto 3 ditë, kur i sheh lojtarët nga brenda, krijon një përshtypje ndryshe nga ajo çfarë ke parë në televizor. Këto 3 ditë jemi munduar, që të njohim akoma më shumë njëri-tjetrin. Atë që kam në kokë unë, edhe pse kohë e shkurtër, të mundohemi t’i bindim. Trajneri ka punën më të vështirë që të bindi lojtarët, se çfarë do bëjnë në fushë, më pas të shpresojë që të dali e duhura.
Stërvitja në “Selman Stërmasi”? E kemi bërë edhe dje, për shkak të mbingarkesës që ka “Skënder Halili”. Edhe për shkak të barit natyral sepse luhet në fushë me bar natyral. Dhe për shkak të ngarkesës që kanë pasur lojtarët, për t’i ruajtur nga dëmtimet.
Vllaznia më e mira? Nuk di të them, por rezultatet i japin të drejtë. Kërkon respekt maksimal. Klasike e Shqipërisë, gjithmonë ka dhuruar ndeshje të forta, mes dy skuadrave që kanë pasur gjithmonë elementë cilësorë brenda. Meriton respekt për atë që ka bërë dhe vendin që ka.
Ne llogaritë i bëjmë për 3 pikë dhe jo 1 pikë. Pastaj të bëjmë maksimumin tonë, të dalim nga fusha me idenë që dhamë gjithçka. Të kërkojmë pak nga fati, por nuk kërkohet duke mos bërë asgjë. E rëndësishme të bëjmë maksimumin, pastaj do pranojmë çdo rezultat që prodhon fusha dhe do vazhdojmë ndeshjen tjetër”, tha Shehi.
Lexo gjithashtu
