Ish-trajneri i Laçit së fundmi, por edhe i Vllaznisë në të shkuarën, Armando Cungu ka analizuar Superioren e këtij sezoni. Në një intervistë të dhënë për “News24”, tekniku shkodran ka folur mbi favoritët e titullit, por edhe ekipet që rrezikojnë rënien nga elita e futbollit shqiptar.
Cungu thotë se Vllaznia nuk e bind, duke u shprehur se nuk e kupton pse ekipin shkodran e shohin si pretendente. Ndër të tjera, trajneri thotë se Dinamo po bën mjaft mirë, sidomos me Ilir Dajën në krye, duke theksuar se jo më kot është në vendin e parë.
Profesor, gënjejnë shifrat në futboll, shifrat thotë që pas dy fazash kryeson Dinamo, është Dinamo ekipi më i mirë?
Të them drejtën, ka bërë paraqitje të mira që me ardhjen e Dajës. Dinamo ka qenë ekip solid, jo rastësisht është në vendin e parë. Ka patur shumë luhatje, i referohem një ndeshje me Laçin.
E prisje Dinamon në këtë pikë, dhe ajo që tifozët janë më shumë të interesuar, i ka Dinamo kartat në rregull për të fituar titullun?
Në futboll ndodh gjithccka, jo gjithmonë fiton më i forti. Nëse flasim për kontingjentin e ekipeve, Partizani mund të jetë një nga ekipet që ka më shumë kontingjent se të tjerat. Dinamo ka ndryshuar me ardhjen e Dajës, jo vetëm në mentalitetin, por edhe në sistem loje.
Me 31 pikë e ndjek Vllaznia, po Vllaznia të bind profesor?
Vllaznia nuk më bind, të jem i sinqertë. E çuditshme që gjendet në këto ujëra, pra pretendente. Po të marrim parasysh ndeshjen e fundit ndaj Laçit, raste më të mira patën këta të fundit. Mos të harrojmë edhe problemet e Vllaznisë, si përshembull dëmtimet.
Duket një ekip i ndarë në dysh, i fortë në Shkodër, i brishtë në transfertë, pse?
E thashë më përpara, nuk bind me lojën. Ka emra të mirë në përbërje, por dëmtimet kanë bërë punën e vet. Në këtë situatë alarmante, stafi duhet të ndalet dhe të analizojë me drejtuesit. Nuk është logjike të ketë kaq shumë dëmtime.
Të premten luan në kryeqytet ndaj Partizanit, si e sheh këtë takim, kë sheh favoritë?
Ndeshje e hapur. Kushdo mund të fitojë këtë ndeshje. Ka prioritet Partizani, për shkak dëmtimeve të Vllaznisë.
Katërshja e final-four plotësohet nga Partizani dhe Egnatia, a është kjo katërshja finale, katërashja që do të diskutojë titullin?
Po, unë mendoj që po. Kjo katërshe është e shkëputur. Dinamo, Vllaznia, Partizani e Egnatia do të garojnë. Pjesa tjetër është e shkëputur. 6-shja e fundit mund të rrezikojë cilado për të rënë më poshtë.
Nga vendi i 7-të Tirana me 18 pikë dhe Skënderbeu i vendit të fundit diferenca është vetëm 3 pikë, a rrezikon Tirana profesor?
Tirana rrezikon me pikët që ka dhe me lojërat që ka zhvilluar. Kam patur mundësi që të hap kampionatin duke pritur Tiranën në Laç, ndeshje e mbyllur 0-0. Më pëlqeu Tirana, kishte bërë goditje në merkato. Çaloi në vështirësi. Nuk mund të them që Tirana nuk ka kontingjent për të qenë në katër vendet e para. Tirana ka probleme që më mirë se ata vetë, nuk i di askush.
Lexo gjithashtu
