
Ditën e sotme, do të ngrejë siparin java e 33-të e “Abissnet Superiore”. Kampionati është futur në javën e fundit, me ekipet që kërkojnë pikë të domosdoshme për të arritur objektivat e tyre.
Dinamo do të sfidojë ditën e sotme Laçin, ndeshje që do të zhvillohet në stadiumin “Elbasan Arena”. Dinamovitët kërkojnë pikë për të synuar “Final 4”, ndërsa në krahun tjetër, kurbinasit nuk duan surprizën më të keqe, për t’u gjendur në zonën “Play Out”. Kjo sfidë do të startojë në orën 18:00.
Po në 18:00, do të nisë edhe ndeshja Skënderbeu-Erzeni, në Korçë. Vendasit po ashtu si Dinamo, janë në kërkim të pikëve për të siguruar një vend në “Final 4”, ndryshe nga Erzeni që është shumë pranë rënies në Kategorinë e Parë.