Maguette Gueye ishte padyshim një nga pikat kyçe të këtij Partizani nënkampion. Edhe pse nuk ia dolën që të fitonin titullin, “Demat” kishin në organikë lojtarë cilësorë, që sigurisht mund të shkojnë shumë më lart seç janë momentalisht.
Një nga ta është pikërisht i lartpërmendur, Maguette Gueye. Ky i fundit ishte fantastik gjatë gjithë sezonin, duke ndihmuar në çdo repart, si mbrojtje, mesfushë apo dhe sulm. Në disa raste, senegalezi mori mbi supe edhe ‘peshën’ e golave, duke realizuar 2 të tillë në fitoren e fundit në derbi përballë Tiranës me rezultatin 2-1.
Ky sezon mjaft i mirë i 21-vjeçarit është vlerësuar edhe nga “Transfermarkt”, madje duke e futur Maguette në historinë e futbollit shqiptar.
Mesfushori nga Senegali ka pasur një rritje të ndjeshme të vlerës së kartonit, e cila shkon në 1 milionë euro. Me këtë vlerë të re të tijën, Maguette bëhet lojtari më i shtrenjtë në historinë e Superiores, duke i ‘lënë targat’ edhe lojtarëve si Peter Olayinka apo Liridon Latifi të cilëve u ka shkuar vlera deri në 800 mijë euro.
Një lajm i mirë ky edhe për Partizanin dhe Gaz Demin të cilët shpresojnë se kjo është një reklamë e mirë për mesfushorin, prej shitjes të së cilit pretendojnë të fitojnë rreth 2 milionë euro.
Lexo gjithashtu
