Klubi i Kukësit do të jetë sot në mbështetje të Egnatias kundër Partizanit. Shkak bëhet rregullorja e futbollit shqiptar, që çon Kukësin në finalen e Superkupës në rast se Egnatia fiton titullin kampion.
“Në rast se një ekip, brenda sezonit shpallet njëkohësisht Kampion Kombëtar i Abissnet Superiore dhe fitues i Kupës se Shqipërisë, atëherë, Superkupa e Shqipërisë do të luhet midis ekipit kampion të Abissnet Superiore dhe ekipit finalist të Kupës së Shqipërisë”, shkruhet në rregulloren e FSHF-së.
Kujtojmë se Kukësi humbi në finalen e Kupës së Shqipërisë përballë Egnatias. Kështu ka fatin të provojë finalen e Superkupës, nëse rrogozhinasit shpallen për herë të parë kampion në historinë e tyre.
Ndeshja Partizani – Egnatia merr jetë në “Air Albania”. Gjithçka nis në 19:00, me skuadrat që mbyllën kampionatin e rregullt me pikë të barabarta.
Lexo gjithashtu
