
Superiorja ditën e djeshme mbylli ndeshjet e javës së 14-të të saj dhe tashmë ekipet nuk kanë shumë kohë për të humbur, pasi sfidat e ardhshme janë “prapa dere”. Kështu java e 15-të e kampionatit do të luhet në 3 ditë.
Të premten do të luhet sfida e vetme mes Bylisit dhe Vllaznisë. Duel që do të zhvillohet në “Adush Muça” në orën 13:30, ku ballshiotët tentojnë rikthimin te fitorja, ndërsa shkodranët kërkojnë 3 pikët për të tentuar vendin e parë në klasifikim.
Ndërkohë ditën e shtunë do të luhen 3 ndeshje. Gjithçka do të nisë me duelin mes Egnatias dhe Elbasanin që do të luhet në “Egnatia Arena” në orën 13:30. Egnatia kërkojnë 3 pikët Për të “blinduar” vendin e 3-të në klasifikim dhe për të tentuar më pas vendin e 2-të. Nga krahu tjetër skuadra e Roberto BordiN do të hyjë në fushë vetëm për fitoren, e cila iu mungon prej shumë javësh.
Paralelisht do të luhet edhe në Kurbin. Laçi do të presë Skënderbeun për të bërë mes tyre llogaritë për këtë takim. Një sfidë direkte mes tyre për të lënë fundin e klasifikim, teksa vetëm 1 pikë kanë korçarëT më shumë se bardhezinjtë.
Po të shtunën do të luhet edhe takimi mes Dinamos dhe Teutës. Përballje që starton në orën 16:30 dhe zhvillohet në “Elbasan Arena”. Dinamovitët vijnë pas barazimit me Skënderbeun, ndërsa Teuta u mposht nga Vllaznia dhe në duelin mes tyre 3 pikët janë mëse të detyrueshme.
Ndërkohë dita e hënë është e gjiTha në favor të derbit të kryeqytetit. Tirana dhe Partizanin do të përplasin “brirët” mes tyre për herë të dytë në këtë sezon, përballje që është parashikuar të startojë në orën 19:00. Një duel që premton spektakël dhe pritet të jetë mjaft i luftuar, ku 3 pikët vlejnë për krenari dhe prestigj. Në këtë përballje Tirana është pritëse dhe me shumë gjasa do të rikthehet në kryeqytet të luajë ndeshjet në shtëpi, teksa tashmë sfidat e Kombëtares kanë përfunduar për këtë vit dhe “Air Albania” mund të presë duelet e ardhshme të bardhebluve. Gjithesesi mbetet të presim ditët e ardhshme për të konfirmuar gjithçka.
