Kategoria Superiore mbylli javën e 33-të e cila kulmoi me derbin Tirana – Partizani që nxorri fitues të kuqtë. Sfida dhe rezultate që kanë nxjerrë verdikte finale si rënia zyrtare e Kukësit pas humbjes me Teutën.
Në këtë panoramë të javës së 33-të, Newsport.al ka përzgjedhur formacionin më të mirë të këtij raundi. 11 lojtarë që shkëlqyen me skuadrat e tyre dhe një vend të rëndësishëm për trajnerin më të mirë i cili drejtoi ekipin e tij drejt suksesit.
-FORMACIONI I JAVËS-
Mario Dajsinani (Laçi) - Në një ndeshje ku Dinamo pati raste të shumta e në fund përfundoi pa asnjë rrjetë të tundur, meritat i takojnë gardianit të kurbinasve. Neutralizoi çdo goditje drejt portës duke ofruar siguri e duke i dhënë 1 pikë bardhezinjve.
Valentino Murataj (Partizani) - Kapiteni bën atë që pritej prej tij në derbi. Sërish në krahun e djathtë, aty ku ofron siguri duke mbyllur boshllëqet në prapavijë e duke qenë iniciator në fazën ndërtuese.
Jocelin Behiratche (Dinamo City) - Ishte i pakalueshëm për lojtarët e Laçit. Fitoi 100% të dueleve duke i dhënë një siguri skuadrës për të shkuar 'all-in' në sulm.
Ajdi Dajko (Laçi) - Njëjëtë si Dajsinani ishte një nga arsyet më të forta pse kurbinasit dolën pa humbje nga sfida me Dinamon. Raste pafund për kundërshtarët dhe Dajko arriti të bllokonte shumë prej tyre. Dalëngadalë rritet e fiton eksperiencë më shumë duke qenë një ndër mbrojtësin shqiptar më premtues për të ardhmen.
Arsid Kruja (Teuta) - Krosimet e tij janë thuajse perfekte. E dërgon topin aty ku dëshiron dhe krijon rrezikshmëri të lartë në zonë. Falë tij erdhi edhe goli i Dacit në një krosim perfekt e jo vetëm kaq. Shumë sipërmarrje në fazën ofensive dhe solid në prapavijë. Paraqitje e denjë për formacionin e javës.
Ardit Krymi (Vllaznia) - Kontrolloi mesin e fushës përballë Egnatias e cila ishte me karton të kuq që në minutën e 8', një karton që erdhi pikërisht nga Krymi i cili fitoi duelin me Xhemajlin dhe e 'detyroi' të bënte atë ndërhyrje. Qetësia, cilësitë dhe eksperienca e tij i dha stabilitet Vllaznisë që merr 3 pikë të arta.
Maguette Gueye (Partizani) - Absolutisht më i miri në derbi dhe Lojtari i Javës në Superiore. Partizanit i ka rënë 'Bingo' me senegalezin i cili është ndër talentët më të mirë të futbollit shqiptar në vitet e fundit. Shënoi të dy golat në fitoren 1-2 ndaj Tiranës, të dy shumë special. I pari ishte një predhë fluturimthi, ndërsa i dyti në minutat e fundit duke sjellë drithërima në stadium.
Geralb Smajli (Vllaznia) - Autori i golit të vetëm në fitoren e artë përballë Egnatias. Ndër më të mirët nga mbrojtësit e djathtë të Superiores duke dominuar në mbrojtje e sulm.
Dejvid Janaqi (Skënderbeu) - Heroi i fitores minimale ndaj Erzenit. Shënoi gol me vlerë 3 pikë që mban korçarët në garë për Final Four.
Arinaldo Rrapaj (Partizani) - Pamë Arinaldon e vjetër, atë të 'Topit të Artë'. Një performancë fantastike në derbi duke dominuar mesin e fushës e duke qenë një rrezik konstant në depërtimet e tij mes 3-4 lojtarëve bardheblu. Duket fluid në çdo aksion ku lëviz me zhdërvjellësi në zonat më të ngushta për t'i dhënë frymëmarrje të kuqve e për të nisur kundërsulme të rrezikshme.
Klejdi Daci (Teuta) - Nuk ka dyshime për lojtarin më të mirë të durrsakëve. Daci shkëlqeu në çdo top të prekur duke qenë rrezik konstant për Kukësin. Shënoi një supergol në pjesën e parë që u anullua në mënyrë të çuditshme nga VAR për një pozicion offside që në përsëritje, vijat në grafik nuk ishin vendosur siç duhet. Megjithatë, kjo nuk e ndali dhe pak minuta më vonë goditi sërish shtyllën e më pas tundi rrjetën ku as VAR nuk e 'ndalte' më.
Trajner: Orges Shehi (Partizani) - Derbi është derbi dhe fituesit i takon copa më e madhe e tortës. Në një javë ku disa ekipe dhuruan një performancë të mirë, fitorja e derbit mbetet gjithnjë në krye. Shehi e nisi me 2 sulmues të mirëfilltë dhe një formacion tipik 4-4-2.
Gjatë gjithë lojës pati ndërhyrje të shumta duke iu përshtatur momentit. Në pjesën e dytë vijoi me të njëjtin modul, por nxorri Muratajn para dhe Hadrojn në mbrojtje, një lëvizje që i dha siguri dhe rrezikshmëri në të djathtë. Partizani i tij fitoi me përmbysje dhe mbetet i pamposhtur në derbi në 7 përballjet e fundit.
Lexo gjithashtu
