Kategoria Superiore mbylli javën e 30-të të kampionatit ku kryesfida ishte ajo mes Partizanit dhe Vllaznisë e cila u mbyll pa gola. Fitore tepër jetike morën Erzeni dhe Laçi që mposhtën Egnatian e Teutën duke hedhur një hap të rëndësishëm drejt mbijetesës.
Në këtë panoramë të javës së 30-të, Newsport.al ka përzgjedhur formacionin më të mirë të këtij raundi. 11 lojtarë që shkëlqyen me skuadrat e tyre dhe një vend të rëndësishëm për trajnerin më të mirë i cili drejtoi ekipin e tij drejt suksesit.
-FORMACIONI I JAVËS-
Pano Qirko (Partizani) – Gardiani i të kuqve ishte meritori kryesor që ndeshja u mbyll pa gola. Dy pritje të jashtëzakonshme ‘tek për tek’ që mbajtën portën e paprekur ndaj Vllaznisë. Veç tyre, ofroi siguri me daljet e tij në krosimet drejt zonës.
Agan Mjaki (Laçi) – Sa vjen e fiton akomë më shumë eksperiencë duke treguar cilësi të mira dhe një kandidat potencial për krahun e djathtë të mbrojtjes për Kombëtaren shqiptare. Futbollisti i kurbinasve dhe i Shqipërisë U21 shkëlqeu ndaj Teutës në fitoren e artë për mbijetesë. Ai dha asistin për golin e vetëm dhe dhuroi një performancë tejet solide.
Randy Dwumfour (Skënderbeu) – I pakalueshëm. Një ndeshje ku korçarët ishin me 10 lojtarë që nga minuta e 15-të, ta mbyllësh duke mos u rrezikuar thuajse asnjëherë është më shumë se fitore. Sulmuesit e Tiranës ishin thjeshtë të pafuqishëm për të çarë murin bardhekuq dhe Dwumfour ishte një arsye kryesore.
Ajdi Dajko (Laçi) – Njëjtë si Mjaki, edhe Dajko ka premisa për të qenë protagonist në 10-vjeçarin e ardhshëm. Portë e paprekur ndaj Teutës dhe performancë thuajse perfekte. U vu në vështirësi gjatë gjithë 90 minutëshit pasi partneri i tij i qendrës, Silva, nuk ishte në nivelin e duhur.
Klevis Shaqe (Skënderbeu) – Mbrojtësi i majtë i korçarëve është gjithmonë një rrezik në daljet e tij nga krahu, por ndaj Tiranës ndeshja u ‘kompromentua’ nga një karton i kuq. Në këtë mënyrë, u detyrua të mendonte vetëm për fazën defansive dhe e kreu gati në prefeksion duke bllokuar Abazajn e Haxhiun.
Bekim Maliqi (Erzeni) – Çdo javë e shohim në pozicione të ndryshme dhe çdo javë ai e bën mjaft mirë. ‘Xholi’ i shijakasve ishte një motorr në krahun e djathtë të mbrojtjes duke ofruar siguri në mbrojtje e një ndihmesë shumë e madhe në fazën ofensive.
Donald Mëllugja (Erzeni) – Jo vetëm për situatën ku ndodhen shijakasit, por ndaj Egnatias, kavajasi e ka një sfidë më tepër. Duhet të tregonte vlerat ndaj ish-ekipit ku nuk iu dhanë minuta dhe ato vlera i tregoi më së miri. I palodhshëm nga mbrojtja deri në sulm. ‘Digë’ për rrogozhinasit dhe një nismëtar i mirë i aksioneve.
Dejvid Janaqi (Skënderbeu) – Zbulimi i sezonit nga korçarët. Mesfushori po shkëlqen nga java në javë ku ka ‘zaptuar’ vendin në formacion. Një mesfushor i kompletuar që ofron cilësi në fazën defansive dhe luan mirë në zonat e ngushta. Ndaj Tiranës pamë Janaqin në rolin e mesfushorit defansiv, kjo për shkak të kartonit të kuq të Rabiut. Një detyre që talenti i Shpresave e kreu në perfeksion.
Moustapha Salami (Kukësi) – Padyshim lojtari më i mirë i Kukësit dhe një ndër më të mirët e Superiores në krahun e majtë. Sulmuesi afrikan shënon një tjetër gol që bën verilindorët të shpresojnë për mrekullinë e mbijetesës.
Agim Zeka (Erzeni) – Heroi i shijakasve në fitoren magjike ndaj Egnatias kryesuese në Arenën e Demave. Ai supergol, jo vetëm që mbetet si një ndër më të bukurit e sezonit, por mund të kthehet si një moment historik në fund të kampionatit teksa rikthen Erzenin të shpresojë për mbijetesë.
William Cordeiro (Laçi) – Goli i vetëm dhe ai i fitores në duelin direkt me Teutën. Braziliani është kthyer në lider te kurbinasit duke mbajtur peshën kryesore në skuadër së bashku me Ujkën. Ofron eksperiencë, cilësi dhe produktivitet duke marrë me meritë të gjitha komplimentet që i vijnë nga trajneri apo opinionistët në studiot televizive.
Trajner: Alfred Deliallisi (Erzeni) – Sa shumë i ka shijuar kjo fitore me Egnatian, zor se do të ketë shijuar ndonjë triumf tjetër në karrierën e tij në futboll. Ato kërcime pas fërshëllimës së trefishtë e bënin të dukej si një ‘fëmijë i lumtur’. Fitore me portë të paprekur ndaj kryesueses së kampionatit është nëj arritje dhe sukses që tregon shpirtin dhe grintën e shijakasve. Erzeni do mbijetesën dhe di si ta marrë në fushën e lojës.
Lexo gjithashtu
