Partizani aktualisht pa një trajner, këto ditë do të tentojë të “gjejë forcën” për t’u ringritur. “Demat” po kalojnë një nga momentet më të vështira në këtë sezon, teksa e shikojnë veten të parafundit në klasifikim.
Humbja në derbi ka mbushur “kupën” dhe tashmë ndryshime priten te të kuqtë. Fillimisht drejtuesit duhet të gjejnë zëvendësuesin e Mladen Milinkovic, për të shpresuar më pas te “ringritja”.
Jemi vetëm 3 ndeshje nga fundit i fazës së parë dhe padiksutim drejtuesit do të duan rikthimin e ekipit në “shinat” e duhura. Nuk do të jetë aspak e lehtë, pasi 3 javë shumë të vështira i presin “Demat”.
Fillimisht pas sfidave të Kombëtares do të luajnë duelin direkt për mbijetesë me Flamurtarin, takim të cilin do ta luajnë në transfertë.
Ndërkohë 1 javë më pas do të presin në “Arenën e Demave” kampionët aktualë të Superiores, Egnatian, ndërsa do ta mbyllin fazën e parë në transfertë dhe do të luajnë “derbin” me Dinamon. Takime këto që sigurisht, ekipi do të kërkojnë maksimumin e pikëve dhe do të shpresojë te ringritja.
Lexo gjithashtu
