Armando Cungu ia doli me Laçin të marrë një fitore të vyer 1 me 2 në Shkodër. Dy ditë pas ndeshjes, trajneri i kurbinasve ka folur për Ora Sport.
Cungu është shprehur hapur kundër skemës së “Final 4”. Ndër të tjera trajneri shkodran ka thënë se kush e mbyll në vendin e parë, duhet dhe të fitojë titullin kampion.
“Do të jetë luftë shumë e fortë deri në fund të kampionatit. Vllaznia është emër i madh i futbollit shqiptar dhe nuk është e lehtë të luash kundër tyre, por loja jonë ka qenë në rritje. Besimi tek ekipi është rritur dhe donim të merrnim diçka në transfertë. E lamë një gjurmë të mirë në Shkodër. Ky është një moment i mirë për Laçin dhe duhet mbajtur ky ritëm. Kemi pasur një ngërç psikologjik pas shumë barazimesh dhe nuk po vinte fitorja. Kemi lojtar të rinj dhe duhet që të rriten gradualisht.
Nuk kam qenë dakord për këtë lloj sistemi. Unë jam për një kampionat siç e ka e gjithë bota. Kush ta mbylli në vendin e parë duhet të fitoj titullin. Këto skemat e tjera nuk më pëlqejnë. Ne duhet të ndjekim kampionatet më të forta në Evropë”, u shpreh Armando Cungu.
Kujtojmë se vendin e parë aktualisht e mban Egnatia. Rrogozhinasit kryesojnë me 6 pikë më shumë se Vllaznia e vendit të dytë.
Lexo gjithashtu
