Në konferencë për shtyp para ndeshjes së nesërme ndaj Mllada Boleslav, e vlefshme për turin e tretë kualifikues të Europa League, kanë dalë trajneri dhe kapiteni i Shkëndijës, Bruno Akrapoviç dhe Ferhan Hasani. Të dy kanë shprehur vlerësimin e tyre për cilësinë e kundërshtarit, por gjithashtu kanë shprehur optimizëm për të bërë një tjetër surprizë.
“Na pret ndeshja e radhës kundër Mllada Boleslavit e cila do të jetë aq e vështirë si ndeshjet paraprake. Kemi analizuar, kemi punuar disa gjëra në stërvitje, kemi analizuar kundërshtarin, do të shikojmë edhe disa video materiale. Do të jetë më e vështirë se sa kundërshtarët tjerë që kishim, pasi ata futen direkt në raundin e tretë dhe vetë kjo flet se sa e fortë është kjo skuadër, sa e kanë vlerën, kështu që askush nuk guxon të mendojë se kemi kundërshtar të lehtë. Përkundrazi do të jetë një prej rivalëve më të vështirë deri tani dhe dua që ekipi im në këto ndeshje të hyjë me përqëndrim siç kemi hyrë në çdo ndeshje që nga fillimi. Të punojmë në atë drejtim pasi përqëndrimi do të jetë kyç në këto ndeshje dhe ato gjëra që i punojmë në stërvitje t’i zbatojmë në ndeshje. Kështu mendoj se mund të shkojmë me optimizëm në këtë ndeshje”, ka thënë Akrapoviç.
“Është kënaqësi të gjendemi sërish këtu para jush dhe për këtë gjë kanë meritë sukseset tona. Të them të drejtën të gjithë flasin se ne kemi bërë 
histori, mirëpo unë dhe shokët e skuadrës mendojmë se historia do të shihet pasi të përfundojmë garat në Evropë. Jemi në rrugë të mirë dhe mund të arrijmë edhe më lartë. Sa i përket ndeshjes me Mllada Boleslav jemi të përgatitur maksimalisht, e dimë se do të jetë ndeshje shumë e vështirë për tu ballafaquar me një kundërshtar të fortë, por ne jemi të vetëdijshëm se mund të kalojmë edhe këtë raund. Normal kemi parë edhe disa video të kundërshtarit, kanë anët e tyre pozitive, por edhe anët negative. Unë me bashkëlojtarët besojmë se me angazhim maksimal të të gjithë lojtarëve dhe realizim të detyrave që do na japë stafi teknik, mund të bëjmë një rezultat të mirë në ndeshjen e parë”, u shpreh Ferhan Hasani.
Lexo gjithashtu
