Është inauguruar fusha e re e futbollit e akademisë “Etien Football Academy” në shkollën “At Zef Pllumi” në Tiranë. Ky është një investim cilësor i akademisë, ku ambienti është rikonstruktuar plotësisht dhe është bërë funksional e modern për fëmijët e akademisë, të shkollës dhe të zonës përreth.
Në ceremoninë e inaugurimit morën pjesë Presidenti i FSHF-së, Armand Duka, Drejtoresha e shkollës “At Zef Pllumi”, Anila Barxho, Drejtuesja e akademisë “Etien Football Academy”, Gelda Lilo, prindër, përfaqësues të medias, etj.
Në fjalën e tij, Presidenti Duka vlerësoi këtë investim të rëndësishëm në një nga zonat më të populluara të Tiranës. Ai theksoi me krenari faktin që akademia drejtohet nga një grua, duke nënvizuar se kontributi i grave në sport është shumë i rëndësishëm dhe i pazëvendësueshëm.
Presidenti Duka përsëriti sërish thirrjen për të gjithë të interesuarit që duan të bashkëpunojnë me Federatën e Futbollit nëpërmjet projektit “100 fushat”, për të ndërtuar sa më shumë fusha cilësore për fëmijët në të gjithë vendin.
“Padyshim që misioni ynë është i njëjtë, i përbashkët dhe objektivi ynë është edukimi i fëmijëve. Ne tentojmë që ta bëjmë këtë nëpërmjet futbollit dhe ju në të gjithë komponentët e edukimit të fëmijëve. Jam vërtet shumë i lumtur që jam bashkë me ju këtu me fëmijët. Dua të falënderoj shumë Akademinë e Futbollit Etien, e cila është një nga akademitë jo vetëm më të mëdha për numrin e fëmijëve që sot ka të regjistruar mbi 250 fëmijë që luajnë futboll, por edhe për kualitetin me të cilin kjo akademi i edukon sportivisht këta fëmijë, por jo vetëm sportivisht.
Në objektivat e punës sonë është përmirësimi i infrastrukturës dhe kjo është një dëshmi e këtij përmirësimi. Kjo fushë do t’u shërbejë fëmijëve që janë këtu, por jo vetëm kjo, por edhe fushat e tjera ku ata stërviten dhe luajnë, do t’u shërbejnë edhe fëmijëve të shkollës. Padyshim që kemi akoma më shumë nevojë, sidomos në Tiranë, për shumë e më shumë fusha sportive, edhe për arsye të dendësisë së popullsisë që ka Tirana, por edhe për arsye të mungesës së sipërfaqeve.
Edhe për këtë ne kemi një projekt ‘100 fushat’, që unë do ta përsëris dhe do t’i ftoj përsëri të gjithë ata që kanë mundësi të bashkëpunojnë me ne. Dua të përmend edhe një fakt tjetër që është vërtet në prioritetet e Federatës së Futbollit: që të kemi sa më shumë vajza dhe gra në futboll. Jo vetëm në fushë, duke luajtur dhe gjykuar, por edhe si zonja sot që drejton këtë akademi shumë të suksesshme në Tiranë, një shembull shumë i mirë suksesi, të cilën unë dua ta falënderoj dhe ta duartrokasim të gjithë bashkë për kontributin në zhvillimin e futbollit.
Jam shumë i bindur që ky bashkëpunim ynë me të gjitha shkollat do të vazhdojë. Ne kemi jo vetëm këtë projekt, por shumë projekte me të gjitha shkollat e Shqipërisë, me Ministrinë e Arsimit, për edukimin e fëmijëve që nga mosha 5 vjeç e më lart, nëpërmjet një projekti që quhet “Playmakers”, apo projekteve të tjera. Projekti “Playmakers” është edukimi apo futja e ndjenjës së sportit te fëmijët nëpërmjet figurave të dashura të tyre të filmave me kartonë dhe programe të tjera në bashkëpunim me Ministrinë e Arsimit për të pasur fëmijë të shëndetshëm, të edukuar mirë edhe nëpërmjet futbollit”, – tha Presidenti i FSHF-së, Armand Duka.
Drejtuesja e “Etien Football Academy”, Gelda Lilo, u shpreh se është një emocion i madh inaugurimi i fushës së re. Ajo falënderoi FSHF-në dhe Presidentin Duka për mbështetjen e vazhdueshme në zhvillimin e futbollit në Shqipëri.
“Është një emocion shumë i madh për mua që sot inaugurojmë këtë fushë të re. Një investim i cili na ka ndihmuar shumë për të ecur përpara, sidomos në fushën e futbollit. ‘Etien Football Academy’ ka mbi 250 fëmijë që rriten dhe stërviten me vlerat e sportit. Një falënderim i veçantë është për Federatën e Futbollit, për Presidentin Armand Duka që është i pranishëm këtu me ne, për drejtoreshën e shkollës, znj. Anila, dhe për prindërit që na besuan. Gjithashtu, falënderoj edhe të gjithë fëmijët që janë prezent sot këtu dhe që do ta shijojnë këtë fushë të re. Ju falënderoj”, – tha Drejtuesja e “Etien Football Academy”, Gelda Lilo.
Ndërsa, drejtoresha e shkollës “At Zef Pllumi”, Anila Barxho, theksoi se fusha e re do të jetë e vlefshme për të gjithë fëmijët e zonës dhe falënderoi Presidentin Duka për gjithçka ka bërë për zhvillimin e futbollit në vendin tonë.
“Ju falënderoj të gjithëve që jeni të pranishëm në këtë moment të gëzuar të inaugurimit të kësaj fushe kaq të bukur, që i vjen në ndihmë sportit dhe fëmijëve të zonës. Si drejtuese e shkollës ‘At Zef Pllumi’, jam shumë e nderuar që të kemi të pranishëm në mjedisin tonë z. Armand Duka, President i FSHF-së. Faleminderit që jeni të pranishëm. Besoj që entuziazmi i fëmijëve është i justifikuar, duke pasur parasysh gjithçka që ju keni bërë për futbollin shqiptar”, – tha Drejtoresha e shkollës “At Zef Pllumi”, Anila Barxho.
Lexo gjithashtu
