Nga Engjëll Serjani
Për mua personalisht, Federata Shqiptare e Futbollit është një nga subjektet më të suksesshme shqiptare në marrëdhëniet ndërkombëtare. Përmes punës së saj të palodhur, ajo jo vetëm që ka ngritur nivelin e futbollit në vend, por edhe ka rritur dukshmërinë e Shqipërisë në arenën botërore. Ky sukses meriton vlerësim të plotë, sepse falë FSHF-së, emri i vendit tonë përmendet gjithnjë e më shpesh në qarqet më të larta të sportit dhe të organizimit ndërkombëtar.
Një dëshmi e qartë e këtij reputacioni është fakti se Tirana po pret për herë të parë mbledhjen e Komitetit Ekzekutiv të UEFA-s, një moment historik që flet për besimin e institucioneve ndërkombëtare tek futbolli shqiptar. Po kështu, Shqipëria ka organizuar me sukses edhe Kampionatin Europian U-17, duke treguar se është e aftë të presë ngjarje madhore me standarde të larta.
Një tjetër shtyllë e këtij suksesi është transformimi i infrastrukturës sportive. Stadiume moderne si Arena Kombëtare, Elbasan Arena, Loro Boriçi dhe Kukës Arena janë jo vetëm terrene të denja për ndeshje ndërkombëtare, por edhe pasqyra e një vizioni që lidh futbollin me zhvillimin urban e shoqëror. Falë investimeve të FSHF-së dhe mbështetjes nga UEFA, Shqipëria sot ka fusha dhe kushte të krahasueshme me shumë vende të zhvilluara.
Rezultatet sportive të Kombëtares sonë e kanë forcuar edhe më shumë këtë imazh. Kualifikimi për Kampionatin Europian “EURO 2024” ishte një moment kulmor, ku Shqipëria tregoi forcën e saj përballë kundërshtarëve të mëdhenj. Jo vetëm rezultatet, por edhe mënyra se si skuadra përfaqëson vendin është bërë një simbol krenarie për shqiptarët kudo në botë.
Në këtë rrugëtim, një rol të pazëvendësueshëm ka pasur Komiteti Drejtues i FSHF-së dhe presidenti Armando Duka, i cili prej më shumë se dy dekadash ka garantuar vazhdimësi, profesionalizëm dhe vizion strategjik. Nën drejtimin e tij, federata është forcuar institucionalisht, ka fituar besimin e FIFA-s dhe UEFA-s, ka arritur të menaxhojë me sukses marrëdhënie të ndërlikuara ndërkombëtare dhe të ndërtojë një kulturë pune që i ka dhënë futbollit shqiptar stabilitet e zhvillim të qëndrueshëm. Ky drejtim i qartë është një nga çelësat e suksesit që sot e bën FSHF një histori frymëzuese për sportin shqiptar.
Por suksesi i FSHF-së nuk qëndron vetëm tek futbolli i parë. Federata ka ndërtuar një model menaxhimi modern e financiarisht të qëndrueshëm, duke rritur të ardhurat dhe duke tërhequr partnerë të rëndësishëm ndërkombëtarë. Kjo qasje ka mundësuar jo vetëm investime të mëdha në infrastrukturë, por edhe projekte sociale e mjedisore, si instalimi i paneleve fotovoltaike që kanë reduktuar ndjeshëm emetimet e karbonit, apo fushatat ndërgjegjësuese për barazi dhe përfshirje.
Një kapitull më vete është puna me gjyqtarët, trajnerët dhe futbollistët e rinj. Me dhjetëra gjyqtarë me badge të FIFA-s dhe me një rritje të vazhdueshme të të rinjve e vajzave që regjistrohen në futboll, FSHF po garanton një të ardhme të shëndetshme për këtë sport. Përmes fondeve të dedikuara për zhvillimin e moshave të reja, futbolli shqiptar po fiton terren të qëndrueshëm edhe në brezat që vijnë.
E gjithë kjo punë e ka bërë FSHF-në një model të vlerësuar edhe nga FIFA dhe UEFA, të cilat shpesh e përmendin Shqipërinë si shembull në menaxhim dhe në përfshirje sociale. Këto arritje nuk janë vetëm sportive: ato janë dëshmi e faktit se përmes organizimit, vizionit dhe profesionalizmit, edhe një vend i vogël mund të fitojë respekt e hapësira të reja në skenën ndërkombëtare.
Prandaj, ky moment historik në Tiranë nuk është vetëm një mbledhje protokollare e qeverisë botërore të futbollit. Është një kurorëzim i punës së FSHF-së, një reflektim i përpjekjeve të saj të pandalshme dhe një arsye më shumë që Shqipëria të ndihet krenare. FSHF ka dëshmuar se sporti është një pasaportë e fuqishme për të prezantuar vlerat dhe imazhin e vendit tonë në botë.
Lexo gjithashtu
