Max Verstappen siguroi një fitore emocionuese në sprintin e Çmimit të Madh të Belgjikës, në garën e parë të Red Bull nën drejtimin e Laurent Mekies pas largimit të Christian Horner. Piloti holandez ruajti vendin e parë për 14 xhiro, duke lënë pas Oscar Piastrin me vetëm 0.753 sekonda diferencë.
Piastri, i cili e nisi nga pole position, u rendit i dyti dhe shtoi avantazhin ndaj shokut të skuadrës, Lando Norris, në nëntë pikë. Norris e përfundoi garën në vendin e tretë, njësoj si pozicioni i nisjes.
Charles Leclerc zuri vendin e katërt për Ferrarin, ndërsa Esteban Ocon i Haas dhe Carlos Sainz për Williams plotësuan gjashtëshen e parë. Pikat e fundit shkuan për Oliver Bearman dhe Isack Hadjar, që përfaqësuan Haas dhe Racing Bulls.
Sprinti ishte zhgënjyes për Mercedes, me George Russell në vendin e 12-të dhe Lewis Hamilton vetëm i 15-ti. Alpine pati gjithashtu probleme, pasi Gasly hyri në garë me dy xhiro vonesë dhe Colapinto u nis nga bokset për shkak të një defekti teknik.
Lexo gjithashtu
