Skënderbeu zyrtarizon Muzakën, tifozët pjesërisht kundër: E morët për të shitur ilaçe?!

Gjergji Muzaka është zyrtarizuar ditën e sotme te Skënderbeu. Pas tre vitesh, një nga futbollistët më të spikatur të kampionatit shqiptar kthehet te skuadra korçare, me të cilën ka kontribuar për të fituar tituj kampionë.

Një rikthim pas largimit nga Tirana në këtë merkato dimri, ndërsa tifozët e Skënderbeut kanë qenë pjesërisht kundër kësaj lëvizjeje nga ana e drejtuesve të klubit bardhekuq.

Në faqen zyrtare të Skënderbeut në Facebook, ka pasur përgjithësisht tifozë që nuk kanë qenë dakord për transferimin e Gjergji Muzakës në skuadrën korçare.

Sipas tyre, 31-vjeçari është larg formës së dikurshme, ndërsa një nga komentet që spikaste ishte: “Përse e morën këtë, apo të shesë ilaçe, se ajo punë i ka mbetur si farmacist që është”.

Por, nuk ka pasur vetëm komente kundër rikthimit të Muzakës në Korçë. Të tjerë tifozë i kanë uruar mirëseardhjen mesfushorit që ka dhënë maksimumin e tij me bardhekuqtë në të kaluarën, ndërsa një nga komentet më të qarta pro kësaj lëvizjeje ishte: Mirë se vjen në shtëpi ujk”.