Kukësi është një nga ekipet më të përfolur në këtë fazë të Superiores për shkak të rezultateve të marra përgjatë këtyre javëve. Kampionët e Shqipërisë duken se do ta kenë mjaft të vështirë të fitojnë sërish trofeun në këtë edicion. Rezultatet nuk kanë qenë ato që priteshin nga drejtuesit e klubit. Emri i trajnerit Mlladen Milinkoviç është përmendur mjaft herë për t'u larguar nga pankina e verilindorëve. Por, presidenti Safet Gjici u ka mbyllur gojën të gjithëve duke i dhënë besim serbit për vazhdimësinë. Për të zëvendësuar Milinkoviç u përfolën Elvis Plori dhe sot Armando Cungu.
Megjithatë newsport.al ka zbuluar prapaskenën për sa i përket ndryshimit të stafit teknik. Presidenca verilindore ka pasur kontakte me Elvis Plorin, madje i ka kërkuar këtij të fundit të vijë në fillim në rolin e ndihmësit të Milinkoviç e më pas të marrë nën drejtim ekipin kampion. Por, kjo nuk ka ndodhur pasi trajneri shkodran nuk ka pranuar kërkesën e verilindorëve. Pritet me interes të mësohet çdo të ndodhë këto ditë me Kukësin, për sa i përket pankinës. Do të qëndrojë ose jo Milinkoviç? Këtë do të na e tregojnë javët në vijim.
Lexo gjithashtu
