Ka mjaftuar një foto me fanelën e Celtic në rrjetet sociale
e presidentit Ilir Meta dhe menjëherë mediet ndërkombëtare kanë reaguar duke
pasqyruar në kanalet e tyre postimin e kreut të shtetit shqiptar. Prestigjozja “The
Sun” i ka kushtuar një artikull të gjatë Metës ku tregohet simpatia e
presidentit të Republikës me tifozët skocezë.
“Presidenti shqiptar, Ilir Meta ka postuar një foto të tijën me fanellën e
Celtic dhe ka ndarë më ndjekësit e tij në rrjetet sociale videon e një goli të
Rudi Vatës në derbin ndaj Rangers. Politikani i njohur shqiptar u shfaq duke
festuar me tifozët skocezë në Sarajevë, Bosnje-Hercegovinë, në fillim të javës
pak para ndeshjes së vlefshme për turin kualifikues të Champions League”, shkruhej
te “The Sun”.
Gjithashtu nënvizohet fakti se fanela që mban veshur presidenti është dhuratë e ish-futbollistit të kombëtares shqiptare dhe Celtic, Rudi Vatës. Nuk kanë munguar as komentet e tifozëve skocezë që menjëherë kanë duartrokitur veprimin e presidentit duke shkruar: “E mrekullueshme, ju shkojnë shumë brohoritjet tona Hail Hail”.
Kujtojmë që presidenti Ilir Meta ndodhej në Bosnje-Hercegovinë ku mori pjesë në Samitin e Procesit të Bashkëpunimit të Vendeve të Europës Juglindore që u zhvillua në Sarajevë. Tashmë kreu i shtetit tonë duket se ka një afeksion të veçantë për tifozët e mrekullueshëm skocezë.
Loading ...
