Milan është kampioni në fuqi i Serie A, teksa këtë sezon është në ndjekje të napolit kryesues në tabelën e klasifikimit me 8 pikë më pak, ndërsa synimi është për të mbajtur kurorën edhe këtë vit. Në një intervistë për “SportMediaset”, trajneri Stefano Pioli ka deklaruar se Napoli këtë sezon është një skuadër fantastike, por kuqezinjtë kurrsesi nuk do të dorëzohen në luftën për titull.
“Duhet të mendojmë që mund të fitojmë titullin kampion. Pastaj nëse Napoli vazhdon me këtë ritëm dhe shkon në 100 pikë, atëherë ka fituar me meritë kampionatin. Ne jemi ambiciozë dhe nuk kemi ndërmend të dorëzohemi.
E arritëm para kohe këtë sukses, sepse kur investon te të rinjtë pret që të fitosh në një kohë më të gjatë. Ne arritëm të triumfonim menjëherë. Nuk i dhamë rëndësi atyre që fliteshin. Duhet të falënderoj ata që nuk besonin te ne, sepse na dhanë forcë shtesë për të arritur këtë objektiv të madh” ka theksuar fillimisht Pioli.
Tottenham? “Do të jetë një ndeshje shumë e rëndësishme dhe stimuluese sepse kishte kohë që Milani nuk kualifikohej në 1/8 e finales. Do të përballemi me një skuadër të madhe që drejtohet nga një trajner shumë i mirë”, ka thënë trajneri i Milanit.
