Mposhti i vetëm JUVENTUSIN një vit më parë, STRAKOSHA përgatitet për RONALDON

Thomas Strakosha është kthyer në ikonën e Lazios që prej 14 tetorit të 2017. Portieri shqiptar u kthye në heroin e padiskutueshëm të bardhekaltërve kur priti penalltinë vendimtare të Paulo Dybalas që i dha Lazios fitoren e parë pas 15 vitesh në Torino ndaj Juventusit. Këtë të shtunë të dyja ekipet përballen sërish në kuadër të javës së dytë të kampionatit italian. Juventusi është bërë shumë herë më i frikshëm me blerjen e Cristiano Ronaldos. Strakosha ka përgjegjësinë për të mbajtur të paprekur portën e Lazios, edhe pse ka përballë skuadrën më të mirë të Italisë dhe njërën prej më të mirave në Europë. Të frenosh Ronaldon është betejë jetë a vdekje për çdo portier dhe mbrojtës, por portugezi nuk është i pandalshëm. Ai është rreziku nummër 1 te i cili do të përqëndrohet vëmendja e bardhekaltërve. Pas asaj penalltie të pritur më shumë se një vit më parë ndaj yllit argjentinas Dybala, Strakosha deklaroi se e kishte studiuar mirë për të nuhatur mënyrën dhe krahun që ekzekutonte 11-metërshat. Ronaldo është një specie tjetër, që nga distanca të tilla nuk fal kollaj. Strakosha dhe Lazio duhet të luten që të shtunën fati të jetë me ta.