Rafael Leao, një nga protagonistët kryesorë të këtij Milani ka dhënë së fundmi një intervistë për “GQ Portugal”. Numri 10 i kuqezinjve i cili rinovoi kontratën me ‘Djallin’ deri në verën e vitit 2028 gjatë intervistës u fokusua në sezonin e kaluar dhe objektivat e tij të radhës.
GJYSMËFINALJA E CHAMPIONS LEAGUE – “Kemi pasur disa mungesa dhe për mungesë zgjedhjesh në stol, Interi ishte dukshëm superior. Ata kanë një ekip shumë të kompletuar, si në 11-shen startuese ashtu dhe në pankinë. Besoj se kjo ishte ajo ç’ka bëri diferencën”, u shpreh Leao.
ËNDRRA ME MILANIN – “Unë besoj se klubi është në rrugën e duhur, ne arritëm vitin e kaluar në gjysmëfinalen e Champions League. Tani objektivi i klubit duhet të jetë që të vazhdojë të rritet, të vazhdojë të jetë më i fortë. Dhe unë jam i sigurt që Milani së shpejti do të rikthehet tek fitimi i Ligës së Kampionëve, gjë që është dhe qëllimi ynë. Unë flas për veten time, jam i ri, jam një lojtar që dëshiron të fitojë gjëra të mëdha, mendoj se Champions League është ëndrra e çdo lojtari”, tha më tej sulmuesi portugez.
MOSHA E RE E EKIPIT – “Edhe pse jemi të rinj, kemi luajtur tashmë më shumë se 50 ndeshje në Serie A, më shume se 20 në Champions League, tashmë kemi një përvojë. Ne mund ta marrim këtë përvojë dhe këtë freski të të qënit të rinj dhe ta zbatojmë atë në fushë për të arritur qëllimet tona”, shtoi 24-vjeçari.
E ARDHMJA – “Kurrë nuk mund të thuash kurrë, por jam në një klub që më ka pritur shumë mirë. Kam rinovuar tani dhe nëse do të mendoja largimin nuk do të rinovoja. Jam i fokusuar që të bëj gjëra të mëdha tek Milani”, tha anësori i majtë.
OFERTAT E MUNDSHME NGA ARABIA SAUDITE – “Nuk kam arritur ende rezultate të shkëlqyera për të shkuar në një kampionat të tillë. Ditët e fundit paratë kanë folur shumë, por për mua një Champions League vlen më shumë se një pagë prej 10 milionësh”, e mbylli fjalën e tij sulmuesi i Milanit.
Lexo gjithashtu
